سڈنی واقعے پر بھارتی و افغان کا جھوٹا پروپیگنڈا بے نقاب

آسٹریلیا کے شہر سڈنی میں پیش آنے والے دہشت گردی کے واقعے کے بعد بھارتی اور افغان سوشل میڈیا اکاؤنٹس کی جانب سے جھوٹا اور گمراہ کن پروپیگنڈا شروع کر دیا گیا ہے۔ ان اکاؤنٹس نے آسٹریلیا میں مقیم ایک پاکستانی نوجوان شیخ نوید کو واقعے کا حملہ آور قرار دینے کی کوشش کی۔

شیخ نوید نے سوشل میڈیا پر جاری اپنے بیان میں واضح کیا ہے کہ ان کا دہشت گردی کے کسی واقعے سے کوئی تعلق نہیں۔ انہوں نے کہا کہ ان کی تصاویر غلط طور پر استعمال کر کے جھوٹ پھیلایا جا رہا ہے، جس سے ان کی ذاتی سلامتی اور ساکھ کو شدید خطرات لاحق ہو گئے ہیں۔

شیخ نوید کا کہنا تھا کہ اس بے بنیاد مہم نے انہیں ذہنی اذیت میں مبتلا کر دیا ہے اور انہوں نے سوشل میڈیا پلیٹ فارمز سے اپیل کی ہے کہ ان کے خلاف پھیلائے جانے والے جھوٹے پروپیگنڈے کو فوری طور پر روکا جائے۔

واضح رہے کہ سڈنی میں ہونے والے دہشت گردی کے واقعے میں 12 افراد ہلاک جبکہ دو پولیس اہلکاروں سمیت 19 افراد زخمی ہوئے تھے۔ پولیس کے مطابق جوابی کارروائی میں ایک حملہ آور مارا گیا جبکہ دوسرے کو زخمی حالت میں گرفتار کر لیا گیا ہے۔ حکام نے کسی بھی پاکستانی شہری کے ملوث ہونے کی تصدیق نہیں کی۔