بھارتی شکایت پر حارث رؤف پر 30 فیصد میچ فیس جرمانہ

21 ستمبر کو بھارت کے خلاف کھیلے گئے میچ میں اوپنر صاحبزادہ فرحان نے نصف سنچری مکمل کرنے کے بعد بیٹ کو بطور گن استعمال کرتے ہوئے فائرنگ کا اشارہ کیا تھا، جبکہ حارث رؤف نے وکٹ حاصل کرنے اور باؤنڈری لائن کے قریب بھارتی تماشائیوں کی ہوٹنگ کا جواب دیتے ہوئے جہاز گرنے کا اشارہ دیا تھا۔

بھارتی شائقین اور کرکٹ بورڈ نے ان اشاروں پر اعتراض اٹھاتے ہوئے آئی سی سی کو شکایت درج کرائی۔ بعدازاں دونوں کھلاڑی میچ ریفری رچی رچرڈسن کے سامنے پیش ہوئے اور تحریری وضاحت بھی جمع کرائی۔

ذرائع کے مطابق، میچ ریفری نے صاحبزادہ فرحان کے خلاف باضابطہ کارروائی نہ کرتے ہوئے صرف وارننگ دی، تاہم حارث رؤف پر جرمانہ عائد کر دیا گیا۔

اس سے قبل بھی آئی سی سی نے 14 ستمبر کو پاک بھارت میچ کے بعد پریزنٹیشن کے دوران متنازع گفتگو کرنے پر بھارتی کپتان سوریا کمار یادیو پر میچ فیس کا 30 فیصد جرمانہ عائد کیا تھا۔