راجیہ لکشمی کی موت کی خبر بے بنیاد نکلی

9 ستمبر کو نیپال میں کرپشن مخالف پُرتشدد مظاہروں کے دوران مظاہرین نے جھالا ناتھ کھنل کے گھر کو آگ لگا دی تھی، جس کے بعد بھارتی میڈیا کے کئی بڑے اداروں بشمول ٹائمز آف انڈیا، این ڈی ٹی وی، نیوز 18، انڈیا ٹوڈے، رپبلک ٹی وی اور دیگر نے یہ خبر نشر کی کہ کھنل کی اہلیہ آگ میں جھلس کر جاں بحق ہو گئی ہیں۔ بعدازاں یہ خبر جھوٹی ثابت ہوئی۔

فیکٹ چیکنگ پلیٹ فارم "بوم لائو” نے نیپالی ادارے Nepal Fact Check اور اسپتال ذرائع کے حوالے سے تصدیق کی کہ راجیہ لکشمی چترکار ابھی زندہ ہیں مگر ان کی حالت تشویشناک ہے۔ ڈاکٹر کرن نکارمی، ڈائریکٹر نیپال کلیفٹ اینڈ برن سینٹر، نے بتایا کہ انہیں شدید جھلسنے کے باعث طبی امداد فراہم کی جا رہی ہے۔

یہ افسوسناک واقعہ ایسے وقت میں پیش آیا جب نیپال بھر میں نوجوانوں کی قیادت میں کرپشن مخالف تحریک شدت اختیار کر گئی۔ پولیس فائرنگ میں 19 افراد ہلاک ہوئے، جبکہ پارلیمنٹ، سرکاری عمارات اور متعدد سیاسی رہنماؤں کے گھروں کو نذرِ آتش کر دیا گیا۔

اس واقعے نے نہ صرف نیپال کے سیاسی استحکام کو متزلزل کر دیا بلکہ بھارتی میڈیا کے غیر مصدقہ دعووں نے ان کے صحافتی معیار پر بھی سوالات کھڑے کر دیے ہیں۔ تجزیہ کاروں کا کہنا ہے کہ بغیر تصدیق ایسی حساس خبریں شائع کرنا نہ صرف صحافتی اصولوں کے منافی ہے بلکہ خطے میں غلط فہمیاں پیدا کرنے کا سبب بھی بن سکتا ہے۔