فیفا ورلڈ کپ میں گروپ سی کے ایک اہم پول میچ میں سعودی عرب نے ارجنٹائن جیسی فیورٹ ٹیم کو ایک کے مقابلے میں دو گول سے شکست دے کر بڑا اپسٹ کر دیا۔
ارجنٹائن کو اپنے پول میں اگلے میچوں میں میکسیکو اور پولینڈ کی سخت ٹیموں سے کھیلنا ہے۔ اس لیے سعودی عرب سے ہارنے کے بعد ان کے کھلاڑیوں کو بہت مضبوط اعصاب کے ساتھ میدان میں اترنا ہو گا۔ جب کہ سعودی عرب کو اپنے آئندہ میچوں میں آج کی فتح سے نفسیاتی طور پر برتری کا احساس ہو گا جو انھیں اگلے میچوں میں بھی فتح سے ہم کنار کر سکتا ہے۔
آج کے میچ کی خاص بات یہ تھی کہ کھیل کے دوران بال ستر فی صد وقت میں ارجنٹائن کے کھلاڑیوں کے قبضے میں رہا لیکن اس کے باوجود سعودی عرب نے اپنے محدود مواقع سے بھرپور فائدہ اٹھا کر تاریخ رقم کر دی۔
سعودی ٹیم کے گول کیپر محمد الاویس کی شاندار گول کیپنگ کی وجہ سے میسی اور اس کے ساتھیوں کے متعدد حملے ناکام ہوئے۔
