ظہران ممدانی کی وینزویلا پر امریکی حملے کی مخالفت

میئر نیو یارک کے مطابق کسی خود مختار ملک پر حملہ کرنا کھلا جنگی اقدام ہے، جس کے اثرات صرف بیرونِ ملک ہی نہیں بلکہ نیو یارک سمیت امریکا کے شہریوں پر بھی مرتب ہوں گے۔ ان کا کہنا تھا کہ ایسے اقدامات عالمی عدم استحکام کو مزید بڑھا سکتے ہیں۔

ادھر امریکی سینیٹر برنی سینڈرز نے بھی صدر ٹرمپ کو شدید تنقید کا نشانہ بنایا۔ برنی سینڈرز کا کہنا تھا کہ وینزویلا پر حملے کے لیے صدر ٹرمپ کی جانب سے دیا گیا جواز وہی ہے جو روسی صدر پیوٹن یوکرین پر حملے کے دفاع میں پیش کرتے رہے ہیں، جو عالمی قوانین اور اصولوں کے منافی ہے۔

واضح رہے کہ گزشتہ روز امریکی فوج نے وینزویلا کے دارالحکومت کاراکس سمیت مختلف علاقوں میں فضائی اور زمینی کارروائیاں کیں، جن کے بعد صدر نکولس مادورو اور ان کی اہلیہ کو حراست میں لے کر امریکا منتقل کر دیا گیا۔ ان واقعات کے بعد عالمی سطح پر شدید ردعمل سامنے آ رہا ہے۔