ٹرمپ نے وینزویلا کے گرفتار صدر کی تصویر جاری کردی

امریکی صدر کا کہنا ہے کہ اس کارروائی کے لیے انتہائی منظم اور مؤثر منصوبہ بندی کی گئی تھی۔ ٹرمپ نے اپنے بیان میں یہ بھی کہا کہ یہ آپریشن امریکی فورسز کی پیشہ ورانہ صلاحیت کا مظہر ہے۔

دوسری جانب وینزویلا کے نائب صدر نے ان دعوؤں کی تردید کرتے ہوئے کہا ہے کہ حکومت کو صدر اور ان کی اہلیہ کے موجودہ مقام کے بارے میں کوئی مصدقہ معلومات حاصل نہیں ہیں۔ نائب صدر کا کہنا تھا کہ اگر ایسی کوئی کارروائی ہوئی ہے تو دونوں شخصیات کے زندہ ہونے کا ثبوت پیش کیا جائے۔

امریکی میڈیا کی بعض رپورٹس میں دعویٰ کیا گیا ہے کہ وینزویلا کے صدر نکولس مادورو اور ان کی اہلیہ سیلیا فلوریس کو امریکی فورسز نے ان کی رہائش گاہ کے بیڈ روم سے حراست میں لیا، تاہم اس حوالے سے آزاد ذرائع سے تاحال تصدیق نہیں ہو سکی۔

بین الاقوامی سطح پر اس معاملے پر تشویش کا اظہار کیا جا رہا ہے، جبکہ کئی حلقے صورتحال کی آزاد اور شفاف تصدیق کا مطالبہ کر رہے ہیں۔ وینزویلا کی حکومت یا فوج کی جانب سے تاحال کوئی تفصیلی باضابطہ بیان سامنے نہیں آیا۔