بنگلہ دیش:سابق وزیراعظم حسینہ کے لاکرز سے قیمتی سونا برآمد

نیشنل بورڈ آف ریونیو کے سینٹرل انٹیلی جنس سیل (سی آئی سی) نے بتایا کہ عدالت کی ہدایت پر ستمبر میں سیل کیے گئے لاکرز کھولے گئے، جہاں سے 9.7 کلوگرام قیمتی سونا ملا۔ برآمد شدہ اشیا میں سونے کی اینٹیں، سکے اور مختلف زیورات شامل ہیں۔

تحقیقات کے مطابق شیخ حسینہ پر الزام ہے کہ وزارتِ عظمیٰ کے دوران ملنے والے کچھ قیمتی تحائف انہوں نے سرکاری توشہ خانہ میں جمع نہیں کرائے، جو قانون کے مطابق لازم ہوتا ہے۔

ریونیو حکام یہ بھی جانچ کر رہے ہیں کہ آیا یہ سونا ان کے ٹیکس گوشواروں میں ظاہر کیا گیا تھا یا نہیں، اور ممکنہ ٹیکس چوری کے پہلوؤں کا جائزہ بھی لیا جا رہا ہے۔

حسینہ واجد کی حکومت کے خاتمے کے بعد ملک میں سیاسی تناؤ میں اضافہ دیکھا گیا ہے، جبکہ فروری 2026 کے عام انتخابات کی تیاریاں بھی غیر یقینی صورتحال سے دوچار ہیں۔

چند ہفتے قبل انٹرنیشنل کرائمز ٹربیونل نے طلبہ کے احتجاج کے دوران حکومتی کریک ڈاؤن کے الزام میں شیخ حسینہ کو سزائے موت سنائی تھی۔ اقوامِ متحدہ کے مطابق اس کریک ڈاؤن میں تقریباً 1400 افراد ہلاک ہوئے تھے۔