بنگلادیش میں 5.7 شدت کا شدید زلزلہ،5 جاں بحق،100زخمی

بنگلادیش میں 5.7 شدت کا شدید زلزلہ،5 جاں بحق،100زخمی

بنگلادیش کے مختلف علاقوں میں جمعہ کی صبح آنے والے 5.7 شدت کے زلزلے نے تباہی مچا دی، جس کے نتیجے میں کم از کم 5 افراد ہلاک اور 100 سے زائد زخمی ہوگئے۔ متعدد عمارتوں کو بھی نقصان پہنچا ہے جبکہ عوام گھبراہٹ کے عالم میں گھروں اور دفاتر سے باہر نکل آئے۔

بنگلا دیشی محکمہ موسمیات کے مطابق زلزلے کے جھٹکے تقریباً 26 سیکنڈ تک محسوس کیے گئے۔ زلزلے کا مرکز دارالحکومت ڈھاکا کے نزدیک نرسنگدی شہر بتایا گیا ہے، جبکہ اس کی گہرائی 10 کلومیٹر ریکارڈ کی گئی۔

جرمن ریسرچ سینٹر کے مطابق جھٹکے نہ صرف بنگلادیش بلکہ بھارتی شہر کولکتہ اور شمال مشرقی بھارت کے بعض علاقوں میں بھی محسوس کیے گئے۔

جانی و مالی نقصان

خبر رساں اداروں کے مطابق زلزلے سے متاثرہ علاقوں میں متعدد عمارتیں جزوی طور پر منہدم ہوئیں، جبکہ کئی لوگ زیر تعمیر ڈھانچوں سے گرنے والی اینٹوں اور ملبے کی زد میں آکر زخمی ہوئے۔

ڈھاکا یونیورسٹی کے طلبہ، گازی پور کی فیکٹریوں کے ورکرز اور نرسنگدی کے مقامی رہائشی بھی زخمیوں میں شامل ہیں۔

ڈھاکا کے ایک شہری نے بتایا کہ "میں نے زندگی میں کبھی اتنے مضبوط جھٹکے محسوس نہیں کیے۔ ہم دفتر میں تھے جب فرنیچر ہلنے لگا، فوراً عمارت سے باہر نکلے تو لوگ پہلے ہی خوفزدہ حالت میں سڑک پر موجود تھے۔”

حکومتی ردعمل

بنگلادیش کی عبوری حکومت کے سربراہ محمد یونس نے جانی نقصان پر گہرے افسوس کا اظہار کیا ہے۔ حکومت نے متعلقہ اداروں کو ہدایت کی ہے کہ متاثرہ علاقوں میں امدادی کارروائیاں تیز کی جائیں اور زخمیوں کو فوری طبی امداد فراہم کی جائے۔