بھارتی تیجس طیارہ تباہ،بھارتی دفاعی صلاحیتوں پر نئے سوالات

یہ واقعہ جمعے کے روز اس وقت پیش آیا جب تیجس ایروبیٹک اسٹنٹ کا مظاہرہ کر رہا تھا۔ طیارہ اچانک توازن کھو بیٹھا اور زمین سے ٹکرا کر مکمل طور پر تباہ ہوگیا۔ بھارتی فضائیہ نے حادثے اور پائلٹ کی ہلاکت کی باضابطہ تصدیق کر دی ہے۔
بھارتی ایئرفورس کے مطابق حادثہ مقامی وقت دو بج کر دس منٹ پر پیش آیا، جب کہ تحقیقات کے لیے ایک کمیٹی بھی تشکیل دی جا رہی ہے۔

ماہرین کا ردِعمل

دفاعی تجزیہ کاروں کا کہنا ہے کہ اس حادثے نے بھارتی دفاعی ٹیکنالوجی اور مینوفیکچرنگ معیار پر پہلے سے موجود خدشات کو مزید گہرا کر دیا ہے۔
ماہرین کے مطابق، حادثے سے قبل سامنے آنے والی ویڈیوز اور تصاویر میں طیارے کے ایندھن کے اخراج اور ساختی کمزوریوں کے آثار واضح تھے، جس سے تیجس کے مجموعی معیار پر سوالات اٹھتے ہیں۔

مینوفیکچرنگ اور ڈیزائن سے متعلق مسائل

میڈیا رپورٹس کا کہنا ہے کہ تیجس پروگرام کو شروع سے ہی متعدد تکنیکی رکاوٹوں کا سامنا رہا۔
رپورٹس کے مطابق:

• بدلتی ہوئی اسپیسفکیشنز
• ٹیکنالوجی کے خلا
• غیر واضح یا تبدیل شدہ ڈیزائن
• پینل الائنمنٹ میں بارہا مسائل
• ایندھن کے لیکیج
• وائبریشن اور ساختی دباؤ

جیسے نقائص نے اس منصوبے کی ترقی کو مسلسل متاثر کیا۔

ماہرین کا یہ بھی کہنا ہے کہ تیجس میں لگایا گیا مقامی انجن مطلوبہ کارکردگی نہیں دے سکا، جب کہ استعمال ہونے والا جی ای انجن بھی طیارے کے ایئر فریم سے مکمل مطابقت نہیں رکھتا تھا۔ اس کے علاوہ تھرسٹ، حرارتی دباؤ اور ’’سمارٹ لوڈ‘‘ کے مسائل مسلسل رپورٹ ہوتے رہے۔

بھارتی دفاعی پروگرام پر اثرات

تجزیہ کاروں کے مطابق، دبئی ایئر شو جیسے عالمی سطح کے ایونٹ میں اس نوعیت کا حادثہ بھارت کے مقامی دفاعی سازوسامان پر اعتماد کو متاثر کر سکتا ہے، خصوصاً اس وقت جب بھارت اپنی دفاعی مصنوعات کو عالمی مارکیٹ میں متعارف کرانے کی کوشش کر رہا ہے۔