شیخ حسینہ اور سابق وزیر داخلہ کی حوالگی کا مطالبہ

ڈھاکا: بنگلہ دیش نے بین الاقوامی جرائم ٹریبونل کے فیصلے کے بعد بھارت سے سابق وزیراعظم شیخ حسینہ اور سابق وزیر داخلہ اسد الزمان خان کی فوری حوالگی کا مطالبہ کیا ہے۔بنگلہ دیشی وزارتِ خارجہ کے مطابق ٹریبونل نے دونوں رہنماؤں کو انسانیت مخالف جرائم میں قصوروار قرار دے کر سزا سنائی ہے، جس کے بعد بھارت پر لازم ہے کہ دونوں کو بنگلہ دیش کے حوالے کرے تاکہ مزید قانونی کارروائی مکمل ہوسکے۔بنگلہ دیشی اخبار کے مطابق وزارتِ خارجہ نے اپنے بیان میں کہا ہے کہ سزا یافتہ افراد کو پناہ دینا “غیر دوستانہ رویہ” سمجھا جائے گا اور یہ انصاف کے تقاضوں کے منافی ہوگا۔ بیان میں مزید کہا گیا کہ دونوں ممالک کے درمیان موجود معاہدے کے تحت بھارت کی قانونی ذمہ داری ہے کہ وہ اس فیصلے پر عمل کرے۔بنگلہ دیش نے بھارتی حکومت پر زور دیا ہے کہ وہ شیخ حسینہ اور اسد الزمان خان کو بنگلہ دیشی عدالتوں کے حوالے کرے تاکہ ان کے خلاف الزامات کے مطابق آئندہ قانونی مراحل درست طور پر آگے بڑھ سکیں۔