اسرائیل نے مغربی کنارہ ضم کیا تو حمایت ختم ہو جائے گی:ٹرمپ

ٹائم میگزین کو دیے گئے انٹرویو میں صدر ٹرمپ نے کہا کہ انہوں نے عرب ممالک سے وعدہ کیا ہے کہ مغربی کنارہ کسی صورت ضم نہیں کیا جائے گا۔ ان کے مطابق، انہوں نے اسرائیلی وزیرِ اعظم نیتن یاہو کو واضح پیغام دیا کہ “دنیا آپ کے خلاف ہے، آپ دنیا سے نہیں لڑ سکتے۔”

ٹرمپ نے کہا کہ اسرائیل ایک چھوٹا ملک ہے، اور قطر پر حملہ اس کی بڑی حکمتِ عملی غلطی تھی۔ انہوں نے مزید بتایا کہ غزہ کی پٹی میں جنگ رک چکی ہے اور اب نیتن یاہو کو امن معاہدہ قبول کر لینا چاہیے۔

امریکی صدر نے کہا کہ وہ مستقبل میں کسی وقت غزہ کا دورہ کرنے کا ارادہ رکھتے ہیں، اور امید ظاہر کی کہ سعودی عرب رواں سال کے آخر تک ابراہیمی معاہدے میں شامل ہو جائے گا۔

یاد رہے کہ حال ہی میں اسرائیلی پارلیمنٹ نے مغربی کنارے کو اسرائیل میں ضم کرنے سے متعلق بل کے پہلے مرحلے کی منظوری دی تھی، جس پر عالمی سطح پر شدید ردِعمل سامنے آیا تھا۔