پاک بھارت مقابلہ،بھارتی کپتان کا ڈریسنگ روم میں اہم پیغام

ایشیا کپ 2025 کے سپر فور مرحلے میں روایتی حریف پاکستان اور بھارت آج ایک بار پھر مدمقابل ہوں گے۔ ہاتھ نہ ملانے کے تنازعے کے بعد دونوں ٹیمیں پہلی مرتبہ آمنے سامنے آ رہی ہیں۔

میڈیا رپورٹس کے مطابق بھارتی کپتان سوریا کمار یادیو نے اس بڑے مقابلے سے قبل اپنی ٹیم کو انوکھا مشورہ دیا ہے۔ انہوں نے کھلاڑیوں کو کہا کہ وہ سوشل میڈیا سے دور رہیں، موبائل فون بند کر کے آرام کریں اور ذہنی دباؤ سے بچیں۔

سوریا کمار یادیو کا کہنا تھا کہ کھلاڑیوں کے لیے اس وقت سب سے اہم چیز یہ ہے کہ وہ بیرونی دباؤ کو خود پر حاوی نہ ہونے دیں۔ ان کے مطابق یہ کہنا آسان لیکن کرنا مشکل ہے، تاہم یہ فیصلہ کھلاڑیوں پر ہے کہ وہ کیا سننا چاہتے ہیں اور اپنے ذہن میں کس بات کو جگہ دینا چاہتے ہیں۔

بھارتی کپتان نے مزید کہا کہ اگر ٹیم نے ٹورنامنٹ میں بہتر کارکردگی دکھانی ہے تو سوشل میڈیا کے شور اور تنقید کو نظر انداز کر کے صرف کھیل پر توجہ مرکوز کرنا ہوگی۔