حماس غزہ میں ہزاروں ملازمین کو تنخواہیں کیسے فراہم کرتی ہے؟

مہنگائی کے بڑھتے ہوئے اثرات اور اجناس کی شدید کمی جس کا الزام امدادی ادارے اسرائیلی پابندیوں پر لگاتے ہیں، غزہ میں جاری ہیں، جہاں حالیہ ہفتوں میں ایک کلو آٹا 80 ڈالر تک پہنچ چکا ہے، جو ایک نیا ریکارڈ ہے۔

بی بی سی کی رپورٹ کے مطابق غزہ میں کوئی فعال بینکنگ سسٹم نہ ہونے کے باعث، تنخواہیں وصول کرنا نہ صرف پیچیدہ عمل بن چکا ہے۔ اسرائیل باقاعدگی سے حماس کے تنخواہوں کے تقسیم کنندگان کو نشانہ بناتا ہے، تاکہ گروپ کی حکومتی سرگرمیوں کو متاثر کیا جا سکے۔

ملازمین، چاہے وہ پولیس اہلکار ہوں یا ٹیکس افسر، اکثر اپنے موبائل فون یا اپنے اہلخانہ کے فون پر ایک خفیہ پیغام وصول کرتے ہیں جس میں انہیں ایک مخصوص مقام پر ایک خاص وقت پر چائے کے لیے دوست سے ملنے کی ہدایت دی جاتی ہے۔

رپورٹ میں بتایا گیا کہ مخصوص مقام پر پہنچنے کے بعد ملاقات کے مقام پر ایک شخص (یا کبھی کبھار ایک خاتون) ان سے آ کر بند لفافے دے دیتی ہے جس میں پیسہ ہوتا ہے، اور بغیر کسی بات چیت کے چلی جاتی ہیں۔

حماس کے وزارتِ مذہبی امور کے ایک ملازم نے اپنی حفاظت کے لیے نام ظاہر نہ کرنے کی شرط پر بی بی سی کو بتایا کہ تنخواہ وصول کرنے میں انہیں کتنی مشکلات پیش آتی ہیں۔ انہوں نے بتایا کہ ہر بار جب میں اپنی تنخواہ لینے جاتا ہوں، میں اپنی بیوی اور بچوں سے الوداع کہہ کر نکلتا ہوں۔ اور ان سے کہتا ہوں کہ ہوسکتا ہے کہ میں واپس نہیں آ سکوں۔ انہوں نے مزید کہا کہ کئی بار اسرائیلی فضائی حملوں نے تنخواہ تقسیم کرنے والے مقامات کو نشانہ بنایا ہے۔ ان کا مزید کہنا تھا کہ جب غزہ سٹی کے ایک مصروف بازار پر حملہ کیا گیا تھا تو خوش قسمتی سے بچ نکلا تھا۔

مارچ میں اسرائیلی فوج نے کہا تھا کہ انہوں نے حماس کے مالیاتی سربراہ اسماعیل بارہوم کو خان یونس کے ناصر اسپتال پر ایک حملے میں ہلاک کر دیا۔ ان پر الزام تھا کہ وہ حماس کے فوجی ونگ کو فنڈز فراہم کر رہے تھے۔

اب تک یہ واضح نہیں ہو سکا کہ حماس نے اپنی تنخواہ کی ادائیگیاں کیسے جاری رکھی ہیں جبکہ اس کی انتظامی اور مالیاتی ڈھانچہ زیادہ تر تباہ ہو چکا ہے۔