افغان صوبےننگرہار میں پاکستانی روپے پر پابندی عائد

تفصیلات کے مطابق افغانستان کے مشرقی صوبے ‎ننگرہار کے گورنر حاجی ملا محمد نعیم اخوند نے صوبے میں لین دین کیلئے ‎پاکستانی روپے کے استعمال پر پابندی عائد کر دی ہےاور ‎افغان کرنسی کو فروغ دینے کے احکامات جاری کئے ہیں۔

افغان سرکاری نیوز ایجنسی باختر کے مطابق گورنر نے ایک خصوصی اجلاس کے دوران حکام کو کرنسی سے متعلق ہدایات جاری کی ہیں۔ بیان کے مطابق صوبے کے باقی علاقوں شینوار، سپین غر ، اچین، لعل پورہ، مومندرہ، نازیان اور دوربابا وہ اضلاع ہیں جہاں پاکستانی روپیہ (کلدارہ) محدود پیمانے پر استعمال ہورہا ہے، تاہم گورنر نے حکم دیا ہے کہ پاکستانی کرنسی کا استعمال مکمل طور پر بند کر دیا جائے اور تمام لین دین افغانی میں کیا جائے۔ ننگر ہار کے گورنر نے صوبے کے ڈپٹی گورنر مولوی عزیز اللہ مصطفی، بینک آف افغانستان، صنعت و تجارت، جلال آباد میونسپلٹی، کان کنی کے امور، اطلاعات و ثقافت، پولیس ہیڈ کوارٹرز اور سرحدی و قبائلی امور کے اداروں کے حکام کو ہدایت کی کہ وہ ضلع میں پاکستانی کرنسی کی روک تھام کے لیے فوری اقدامات کریں۔

افغان گورنر نے ان اداروں کے حکام کو تاجروں، قبائلی مخیر حضرات اور علمائے کرام کے ساتھ ہنگامی اجلاس منعقد کرنے اورپاکستانی کرنسی میں لین دین کو روکنے کے لئے عملی اقدامات کی بھی ہدایت کی۔دوسری طرف پاکستانی ذرائع نے اس امر پر اطمینان کا اظہار کرتے ہوئے کہا ہے کہ افغانستان میں روپے کے لین دین پر پابندی سے پاکستانی کرنسی کی افغانستان اسمگلنگ کم کرنے میں مدد ملے گی جس میں زیادہ تر افغان شہری ملوث ہیں۔