ملتان میں دوسرا ٹیسٹ، امام الحق کی شمولیت کا امکان

ملتان ہی میں کھیلے جانیوالے پہلے ٹیسٹ میں پاکستان نے ویسٹ انڈیز کو تیسرے دن 127 رنز سے شکست دی تھی۔

اب اطلاعات ہیں کہ تجربے کار اوپنر امام الحق کو دوسرے ٹیسٹ کی ٹیم میں شامل کیا جاسکتا ہے۔

ویسٹ انڈیز کے خلاف پہلے ٹیسٹ میں محمد ہریرہ نے ٹیسٹ ڈیبیو کیا تھا، انہوں نے کپتان شان مسعود کے ساتھ اننگز کا آغاز کیا تھا۔

البتہ امام الحق کی ٹیم میں شمولیت کی صورت میں وہ ہریرہ کے ساتھ اننگز کا آغاز کریں گے جبکہ کپتان شان مسعود نمبر 3 پر بیٹنگ کریں گے۔

ٹیم مینجمنٹ اور سلیکشن کمیٹی ملتان کی سلو اور ٹرننگ پچ پر اضافی بیٹر کے ساتھ کھیلنے کا ارادہ رکھتی ہے اور ایسی صورت میں ٹیم میں شامل واحد فاسٹ بولر خرم شہزاد کو ڈراپ کیا جاسکتا ہے۔

29 سال کے امام الحق نے پاکستان کے لئے آخری ٹیسٹ دسمبر 2023 ءمیں میلبورن میں آسڑیلیا کے خلاف کھیلا تھا۔

بائیں ہاتھ کے بیٹر نے 24 ٹیسٹ کی 46 اننگز میں 37 اعشاریہ 33 کی اوسط سے 1568 رنز 3 سینچریوں اور 9 نصف سینچریوں کی مدد سے بنا رکھے ہیں۔

آئی سی سی چیمپئنز ٹرافی سے پہلے ان فٹ صائم ایوب اور آؤٹ آف فارم عبداللہ شفیق کی عدم موجودگی میں سلیکشن کمیٹی تجربے کار امام الحق پر بھی نظر رکھے ہوئے ہے۔

امام الحق نے پاکستان کے لئے 72 ون ڈے میچو ں میں 48 اعشاریہ27 کی اوسط سے 3138 رنز 9 سینچریوں اور 20 نصف سینچریوں کی مدد سے بنا رکھے ہیں۔