پاکستانی ون ڈے اسکواڈ وطن واپسی کیلئے جوہانسبرگ سے روانہ

پاکستان کرکٹ ٹیم کے ون ڈے اسکواڈ کے کھلاڑی براستہ دبئی وطن واپسی کےلیے جوہانسبرگ سے روانہ ہوگئے۔

جوہانسبرگ سے پاکستان کےلیے روانہ ہونے والے کھلاڑیوں میں شاہین شاہ آفریدی، حارث رؤف، سفیان مقیم، طیب طاہر، عثمان خان، ابرار احمد، عرفان خان اور محمد حسنین شامل ہیں۔

جنوبی افریقا کے خلاف ون ڈے سیریز میں شامل دیگر کھلاڑیوں نے ٹیسٹ اسکواڈ کو جوائن کرلیا ہے۔

پاکستان اور جنوبی افریقا کے درمیان 2 ٹیسٹ میچز کی سیریز کے اسکواڈ میں بابراعظم، محمد رضوان، صائم ایوب، نسیم شاہ، سلمان علی آغا، کامران غلام اور عبداللّٰہ شفیق ون ڈے ٹیم سے شامل ہوئے ہیں۔

پاکستانی ٹیسٹ اسکواڈ کل سنچورین میں پریکٹس کرے گا، اس میدان میں پہلا ٹیسٹ 26 دسمبر سے شروع ہوگا۔

یاد رہے کہ پاکستان نے جنوبی افریقا کو اُس کی سرزمین پر 3 ایک روزہ میچز کی سیریز میں وائٹ واش شکست سے دوچار کیا ہے۔

جنوبی افریقا کے خلاف سیریز کے دوران شاندار پرفارمنس پر صائم ایوب کو تیسرے میچ اور سیریز کے بہترین کھلاڑی کےا عزازت سے نوازا گیا۔

پاکستانی آل راونڈر نے اس دوران 235 رنز اسکور کیے اور ساتھ ہی 2 وکٹ اپنے نام کیں۔