پی سی بی نے نئے مالی سال کے بجٹ کی منظوری دے دی

پاکستان کرکٹ بورڈ (پی سی بی) نے مالی سال 25- 2024ء کے بجٹ کی منظوری دے دی۔

قذافی اسٹیڈیم لاہور، نیشنل بینک اسٹیڈیم کراچی اور راولپنڈی اسٹیڈیم کی اپ گریڈیشن پراجیکٹ کےلیے 12 ارب 80 کروڑ روپے مختص کردیے گئے۔

بجٹ اجلاس میں ویمن کرکٹرز کے سینٹرل کنٹریکٹ میں اضافے کی منظوری بھی دی گئی۔

چیئرمین پی سی بی محسن نقوی کی زیر صدارت نیشنل کرکٹ اکیڈمی میں منعقدہ اجلاس میں بورڈ آف گورنرز کے تمام ممبران نے شرکت کی، جس میں پی سی بی کے بجٹ کی منظوری دی گئی۔

اس موقع پر چیمپئنز ٹرافی 2025ء کے تینوں وینیوز کے اپ گریڈیشن پراجیکٹ کےلیے 12 ارب 80 کروڑ روپے مختص کیے گئے جبکہ ڈومیسٹک کرکٹ کے فروغ کےلیے 4 ارب 50 کروڑ کے فنڈز رکھے گئے ہیں۔

اجلاس میں ڈومیسٹک کرکٹ کے کھلاڑیوں کے کنٹریکٹ میں اضافے کی منظوری دی گئی جبکہ ویمن کرکٹ کا بجٹ پہلی بار 7 کروڑ روپے سے بڑھا کر 24 کروڑ روپے کرنے کے ساتھ ان کے سینٹرل کنٹریکٹ میں اضافے کی منظوری بھی دی گئی۔

اجلاس میں اراکین کو اگلے برس پاکستان میں آئی سی سی چیمپئنز ٹرافی کی تیاریوں کے بارے بریفنگ دی گئی۔

چیئرمین پی سی بی محسن نقوی کا کہنا تھا کہ چیمپئنز ٹرافی کےلیے انٹرنیشنل معیار کے انتظامات کیے جائیں گے، ایونٹ سے قبل اسٹیڈیمز کی اپ گریڈیشن کا کام مکمل کیا جائے گا۔

انہوں نے مزید کہا کہ اسٹیڈیمز کی اپ گریڈیشن سے شائقین کرکٹ کےلیے سہولتیں بہتر ہوں گی۔

محسن نقوی نے ڈومیسٹک اور ویمن کرکٹ کو مضبوط بنانے کے لیے کیے گئے اقدامات کے بارے اراکین کو آگاہ کیا۔