پوٹھوہاری غزل

شاعر : عبدالرحمن واصف

اَکھّاں چ لَو، کُھوخاں پُر سُرخی نِینہ رَہنی
پُہھکھ لِشکے تے جان سُخَلّی نِینہ رَہنی

اِسّے آسطیں رَجّی اَتھروں ڈوہلنے آں
بَرھنے بَدلے چ تُہھوڑ تے مِٹّی نِینہ رَہنی

سچ سُنانے نے شونقی اے یاد رَکھن
سچ آخی جُثّے پُر چَمڑی نِینہ رَہنی

اُس کی کُھلّا پِھرن دیو ہر باغے وِچ
قید کَرو خَشبو تے بوہتی نِینہ رَہنی

عشق کَری فِر مُڑنے نی گَل بات نہ کر
عشقے اندر اپنی مرضی نِینہ رَہنی

اَٹکل تے عشقے وِچ دشمن داری اے
عشق ہووے تے اَٹکل شوہدی نِینہ رَہنی

ویلا کَڈّھی سَٹنا کُوناں کَسراں سب
واصف جی فر شوہدی کَھنگ وی نِینہ رَہنی