پاکستان ہائی کمیشن نئی دہلی میں یوم پاکستان جذبہ حب الوطنی سے منایا گیا۔

ناظم الامور پاکستان ہائی کمیشن سعد احمد وڑائچ نے چانسری لان میں قومی پرچم بلند کیا، تقریب میں صدر مملکت اور وزیراعظم پاکستان کے پیغامات پڑھ کر سنائے گئے۔

ناظم الامور سعد احمد وڑائچ نے کہا کہ پاکستان کی خوشحالی اور ترقی کیلئے اپنی اجتماعی کوششوں کو تیز تر کرنا ہے، پاکستان کی سب سے بڑی طاقت اس کے محنتی عوام ہیں، پاکستان مشرقی، مغربی اور وسطی ایشیا کے مابین ایک پل کا کردار ادا کرتا ہے، تجارت، روابط اور علاقائی ہم آہنگی کے مرکز کے طور پر پاکستان اپنا کردار ادا کرتا رہے گا۔

سعد احمد وڑائچ نے مزید کہا کہ پاکستان ایک پرامن جمہوری جدوجہد سے معرض وجود میں آیا، مساوات اور باہمی احترام پر مبنی پرامن بقائے باہمی پاکستان کی خارجہ پالیسی کے رہنما اصول ہیں، یہی اصول پاکستان کی بھارت کے ساتھ پرامن تعلقات کی خواہش کی بھی بنیاد ہیں۔

ناظم الامور نے کہا کہ جنوبی ایشیا میں پائیدار امن اور استحکام مسئلہ کشمیر کے منصفانہ حل کے ذریعے ہی ممکن ہے، ہماری امن کی خواہش ایک مضبوط اور پراعتماد قوم کی تعمیری اور مثبت سوچ کی عکاس ہے۔