رانا سعید دوشی کا نیا مجموعہ غزل "آگ میں اجالا ہے”

رمیل ہاؤس آف پبلیکیشنز کے زیر اہتمام شائع ہونے والے 160 صفحات پر مشتمل اس مجموعے میں 115 غزلیں شامل ہیں۔

رانا سعید دوشی وہ خوش قسمت شاعر ہیں جن کے اشعار نہیں پوری پوری غزلیں زبان زد عام ہیں۔ ان کی درج ذیل غزل دیکھیں

کیوں کرتا ہے کم ظرفوں سے تو تکرار سمندر
جیسے گزرے خاموشی سے وقت گزار سمندر

آج نہ جانے دوں گا تجھ کو اپنی آنکھ سے باہر
دھاڑیں مار سمندر، چاہے ٹھاٹھیں مار سمندر

جتنی آسانی سے میں نے تجھ کو پار کیا ہے
کیا تو ایسے کر سکتا ہے مجھ کو پار سمندر؟

میں سیراب کروں صحراؤ میری آنکھ میں آؤ
پیاس تمہاری ہے ہی کتنی بس دو چار سمندر

یا پھر یہ غزل۔۔۔

صحرا کے ذرے آنکھ سے گیلے نکلتے ہیں
نشے میں میرے اشک نشیلے نکلتے ہیں

بانسوں کے جنگلوں سے گزرتی ہے میری سانس
تب جا کے چار بول سریلے نکلتے ہیں

اے شہر کرگساں! ہمیں آنکھیں عزیز ہیں
ان کو بچا کے اب کسی حیلے نکلتے ہیں

رانا سعید دوشی کی یہ غزل تو اردو دنیا کی معروف غزل ہے۔۔۔

کہاں کسی کی حمایت میں مارا جاؤں گا
میں کم شناس مروت ميں مارا جاؤں گا

میں مارا جاؤں گا پہلے کسی فسانے میں
پھر اس کے بعد حقیقت میں مارا جاؤں گا

مجھے بتایا ہوا ہے مری چھٹی حس نے
میں اپنے عہدِ خلافت میں مارا جاؤں گا

مرا یہ خون مرے دشمنوں کے سر ہوگا
میں دوستوں کی حراست ميں مارا جاؤں گا

رانا سعید دوشی کی نظموں کا مجموعہ بھی جلد منظر عام پر آ رہا ہے۔

راشد عباسی