آسٹریلیا کیخلاف سیریز سے قبل پاکستانی ٹیم کو بڑا دھچکا

کینبرا میں پرائم منسٹرالیون کے خلاف 4 روزہ میچ کے تیسرے روز اسپنر ابرار احمد نے 8 اوورز کے بعد دائیں ٹانگ میں تکلیف کی شکایت کی، جس کے بعد انہیں آرام کے لیے بھیج دیا گیا۔
پاکستان کرکٹ بورڈ (پی سی بی) کی جانب سے جاری اعلامیے میں کہا گیا ہے کہ 25 سالہ ابرار احمد کو ٹانگ میں تکلیف کے بعد ایم آر آئی اسکین کے لیے بھیج دیا گیا، میڈیکل پینل کی جانب سے ایم آر آئی رپورٹس کا جائزہ لینے کے بعد ان کے بارے میں مزید معلومات سے میڈیا کو آگاہ کیا جائے گا۔
ابرار احمد نے پرائم منسٹر الیون کے خلاف میچ میں ابتک کل 27 اوورز کرائے ہیں، جس میں انہوں نے 80 رنز دے کر ایک وکٹ حاصل کی ہے۔
واضح رہے کہ 4 روزہ میچ آسٹریلیا کے خلاف تین میچوں کی ٹیسٹ سیریز سے قبل پاکستان کے لیے پریکٹس میچ تھا۔
دونوں ٹیموں کے درمیان سیریز کا پہلا میچ 14 دسمبر پرتھ کرکٹ اسٹیڈیم میں کھیلا جائے گا۔