اماں ڑی اماں ….

اپنے جاگے گروی رکھ تے
تیڈے قصیں وچوں اساں
روز نواں ہک قصہ سنڑدوں
جی آکھوں تاں توں سنڑویندیں
ساکوں آدم بو دے قصے
جلئے ہوئے کوہ طور دے قصے
نہ کر نانی اماں ہنڑ تاں
جنت حور قصور دے قصے
آج تک تئیں سنڑوائے کینی
ساکوں شاہ منصور دے قصے
اماں ڑی اماں
نانی اماں
کے تئیں وحشتناک اندھاری
رات اساڈے قصیں وچوں
چونڑے کھول تے نچدی راہسی
ہنڑ تاں تیڈے قصیں وچوں
ڈر پیا لگدے
اماں ڑی اماں
نانی اماں
کے تئیں کانڑے دیہہ دے قصے
ساڈے حصے؟؟؟

اخلاق مزاری