رمضان المبارک کے بقیہ دنوں میں مسجد اقصیٰ میں غیر مسلموں کے داخلے پر پابندی عائد کر دی گئی ہے، جبکہ دوسری جانب اسرائیلی فوج نے مغربی کنارے میں مزید 2 فلسطینیوں کو شہید کردیا،واضح رہے کہ رواں سال اب تک اسرائیلی فوج کی کارروائیوں میں 96 فلسطینی شہید ہوچکے ہیں۔
تفصیلات کے مطابق اسرائیل نے رمضان کے اختتام تک یہودیوں سمیت تمام غیرمسلموں کے مسجداقصیٰ آنے پر پابندی لگادی۔اسرائیلی وزیراعظم نیتن یاہو نے رمضان کے آخری عشرے میں یہودیوں اور سیاحوں کے مسجد اقصیٰ کے احاطے میں داخلے پر پابندی کا حکم جاری کیا۔ یہاں یہ امر بھی قابل ذکر ہے کہ 5 اپریل کو رمضان المبارک کے دوسرے عشرے کے دوران اسرائیلی فوج نے مسجد اقصیٰ کے احاطے میں نمازیوں پر حملہ کر کے درجنوں فلسطینیوں کو زخمی اور سیکڑوں کو گرفتار کرلیا تھا۔
