بھارتی ٹینس اسٹار ثانیہ مرزا اور پاکستانی ٹیسٹ کرکٹر شعیب ملک کے درمیان اختلافات اور طلاق کی خبریں گزشتہ کئی روز سے میڈیا کی زینت بن رہی ہیں تاہم دونوں نے اس حوالے سے چپ سادھ رکھی ہے ۔ اب تک دونوں میں سے کسی نے بھی اس حوالے سے کوئی واضح بات نہیں کی تاہم گزشتہ روز 15نومبر کو ثانیہ مرزا کی سالگرہ کے موقع پر شعیب ملک نے انہیں "برتھ ڈے وش” کیا جس سے دونوں اسٹارز کے مداحوں کی جان میں جان آئی ۔ تاہم بہت سارے مداح اس بات پر ابھی تک پریشانی کا شکار ہیں کہ شعیب ملک کے ٹویٹر پوسٹ پر ثانیہ ملک نے کوئی تبصرہ یا لائک کیوں نہیں کیا۔
یہ امر قابل ذکر ہے کہ تقریبا 2 سال پہلے بھی دونوں اسپورٹس اسٹارز کے درمیان طلاق کی خبریں گرم ہوئی تھیں تاہم ان خبروں کی عملی تردید اس وقت سامنے آگئی جب ثانیہ مرزا اچانک دبئی پہنچ گئیں جہاں کرکٹ سیریز کے میچ چل رہے تھے ،جن میں ان کے شوہر شعیب ملک پشاور زلمی کو ہیڈ کر رہے تھے ۔شعیب ملک اور ثانیہ مرزا کے قریبی حلقوں کا کہنا ہے کہ دونوں کے درمیان چھوٹے موٹے اختلافات کو رد نہیں کیا جا سکتا جیسا کہ کسی بھی جوڑے یعنی میاں بیوی کے درمیان ہوتا ہے تاہم نوبت طلاق تک آنے والی بات درست نہیں لگتی۔
بعض لوگ ثانیہ مرزا کی جانب سے سوشل میڈیا پر ایک اداس پوسٹ کو بنیاد بنا کر معاملے کو ممکنہ طلاق سے جوڑنے کی کوشش کر رہے ہیں جب کہ بعض لوگوں کا خیال ہے کہ اداکارہ و گلوکارہ عائشہ عمر کے ساتھ شعیب ملک کی حالیہ دنوں میں سامنے آنے والی ایک تصویر دونوں کے درمیان اختلافات کی شدت کا سبب بنی ہے تاہم جب تک خود ثانیہ مرزا کی جانب سے اس حوالے سے کوئی تصدیق یا تردید سامنے نہیں آتی ،حتمی طور پر کچھ کہنا ممکن نہیں ہے۔
