ہک چڑی نیاں ترے (3) نصیحتاں

پہاڑی ترجمہ: رَاشِد عَبّاسی

ہِک شکاریے جال کھلاری تَہ ہِک چِڑی کی بَندی وان کَری کِہندا۔ چِڑی اُس کی آخیا،

”خُدا نَیاں بَندیا ! تُو بَہوں ہرن، بکرے تَہ کُکڑ کھاہدے۔ اُنھاں نَیں مقاولے وِچ مَہاڑی کَیہ حیثیت اِی۔ مہاڑے وِچ تَہ ہِک گراء جتنا وی ماس ناء۔ اِس نال تَہاڑا کَیہ بَنسی؟ ہاں ! کَدے تُو مِیکی آزاد کَری شوڑَیں تَہ میں تُو کی ترے (۳) نصیحتاں کَرساں جِنھاں اُپّر عمل کری تَہ تُو بَہوں فائیدے چائی سَکناں ایں۔کَدے تُکی منظور وَیہہ تَہ ہِک نصیحت میں ہُن کَرساں، دُوئی اُس ویلے کَرساں جِسلَے تُو مِیکی آزاد کَرسَیں تَہ اخیرلی نصیحت اُس ویلے کَرساں جِسلَے میں کَندَے (دیوارے) اُپرا اُڈری تَہ بُوٹے اُپّر گَچھّی بَیساں“

شکاریے نَیں دِلے وِچ کَنسُو اُٹھّی کہ خورے چِڑی کَیہ فائیدے والیاں نصیحتاں کَرسی۔ اُس چِڑی نی گَل مَنّی کِہندی۔

چِڑی آخیا۔۔

”پہلی نصیحت یاء ای کہ جِہڑی گَل کَدے ہوئی اے نئی سَکنی، اُس ناں یقین نہ کریں“

اپنا وائیدہ پُورا کری تے شکاریے چِڑی کی آزاد کَری شوڑیا۔ چِڑی گَچھّی کَندے اُپّر بئی تَہ شکاریے کی دُوئی نصیحت کِیتی۔۔

”جِہڑی گَل ہوئی گَچھّے اُس ناں غَم نہ کریں“

نال یے چِڑی شکاریے کی آخن لَگّی۔۔۔

”چَہھلیا! تُو مِیکی چھوڑی تَہ بَہوں بڑی غلطی کیتی۔ مہاڑے پیٹ وِچ ہِک پاء وزن ناں قیمتی موتی آ۔ کدے تُو مِیکی حلال کری تَہ اوہ موتی کَڈھی کِہنناں تَہ تُو بَہوں امیر ہوئی گَچھّیں آ“

چِڑی نی گَل سُنی تَہ شکاریے تَہھاڑا لوٹی بائی شوڑی۔ ”ہائے چِڑی کی آزاد کَری تَہ میں بَہوں بڑی غلطی کیتی۔ کَدے میں اس کی حلال کری تَہ موتی کَڈّھی کِہنناں تَہ مہاڑیاں سَت نسلاں امیر ہوئی گَچھّن آ“

چِڑی اُس کی تَہھاڑا بانیاں دِکھیا تَہ اُس کی آخنے لَگّی۔۔۔ ”اوہ لَل بَلَلیا! میں تُوئی پہلی نصیحت کیتی کہ جِہڑی گَل ہوئی یے نَئی سَکنی، اُس ناں یقین نہ کَریں۔ ساد مرادیا۔۔ ہک چھٹاکی چِڑی نَیں پیٹے وِچ ہِک پاء وزن ناں موتی کِسرَے ہوئی سَکناں؟“

فِر چِڑی اُس کی آخیا۔۔۔”میں تُوکی دُوئی نصیحت یاء کیتی سی کہ جِہڑی گَل ہوئی گَچھّے اُس ناں غم نہ کریں۔ تُو اس کی وی ہِک دم پُہلائی شوڑیا۔ تَہاڑے جئے بَندے کی تری نصیحت کری تَے اپنی نصیحت کی ضائیاں ناء کَرناں چائیناں“

یاء گَل آخی تَہ چِڑی پھُر کَری تَہ اُڈری گی۔