10 مرلہ پلاٹ بیوی اور بیٹی کے قتل کی وجہ بنا

تحقیقات کے مطابق ملزم ڈی ایس پی عثمان حیدر نے دو شادیاں کر رکھی تھیں اور پہلی بیوی کے نام 10 مرلے کا پلاٹ خریدا تھا۔ بعد ازاں ملزم نے مبینہ طور پر وہ پلاٹ واپس لے کر فروخت کر دیا اور اس سے حاصل ہونے والی رقم ذاتی استعمال میں لے آیا، جس پر میاں بیوی کے درمیان شدید جھگڑا ہوا۔

پولیس کے مطابق دورانِ تفتیش ملزم نے اعتراف کیا کہ پلاٹ کی رقم اس نے اپنے بھائی کی شادی کے اخراجات پر خرچ کی۔ جھگڑے کے دوران ملزم نے چھری کے وار کر کے اپنی اہلیہ کو قتل کیا، جبکہ واردات میں استعمال ہونے والا آلہ قتل بھی برآمد کر لیا گیا ہے۔

پولیس حکام کا کہنا ہے کہ ڈی ایس پی عثمان حیدر کی بیوی اور بیٹی کی گمشدگی کا معمہ حل ہو چکا ہے، اور ملزم نے دونوں کے قتل کا اعتراف کر لیا ہے۔ ابتدائی اطلاعات کے مطابق ملزم نے اہلیہ اور بیٹی کو مبینہ طور پر فائرنگ کر کے قتل کیا تھا، تاہم تفتیش کے دوران مزید حقائق سامنے آ رہے ہیں۔

واقعے کے بعد پولیس نے ڈی ایس پی عثمان حیدر کو گرفتار کر کے مقدمہ درج کر لیا ہے جبکہ کیس کی مزید تفتیش جاری ہے۔ یہ افسوسناک واقعہ معاشرے میں گھریلو تشدد اور طاقت کے ناجائز استعمال پر سنگین سوالات کھڑے کر رہا ہے۔