غزل۔۔۔۔۔۔۔۔شاہد ذکی
راز اندر ہی سموتا تو سمندر ہوتا
دل کوئی روز نہ روتا تو سمندر ہوتا
تیری ضد نے تجھے تالاب بنا رکھا ہے
تو مِرے پاؤں بھگوتا تو سمندر ہوتا
میں وہ دریا ہوں جو آہستہ روی میں سوکھا
میں اگر سُست نہ ہوتا تو سمندر ہوتا
کر گئی جھیل مجھے امن پسندی میری
بستیاں میں بھی ڈبوتا تو سمندر ہوتا
ہار کر چشمۂ خوابیدہ تہِ سنگِ کراں
اور کچھ دیر نہ سوتا تو سمندر ہوتا
یہ بگولے یہ مد و جزر مِری مٹّی کا
میں اگر دشت نہ ہوتا تو سمندر ہوتا
آبِ شفاف لیے یہ جو کنواں ہے شاہد
داغ دو چار کے دھوتا تو سمندر ہوتا۔۔۔
شاہد ذکی
