راولاکوٹ جیل سے فرار 19 میں سے 2 قیدی گرفتار

آزاد کشمیر کے ضلع پونچھ کی ڈسٹر کٹ جیل راولاکوٹ سے فرار ہونے والے 19 قیدیوں میں سے 2 قیدی گرفتار کر لیے گئے۔

پولیس کے مطابق دونوں مفرور قیدیوں عثمان اور فیضان کو جنگل سے آپریشن کے دوران گرفتار کیا گیا، آپریشن کے دوران 3 پولیس اہلکار زخمی بھی ہوئے۔

گرفتار کیے گئے دونوں قیدیوں کو سزائے موت سنائی گئی تھی۔

راولاکوٹ جیل سے قیدیوں کے فرار پر آئی جی جیل کو عہدے سے ہٹا دیا گیا

واضح رہے کہ 30 جون کو آزاد کشمیر کے ضلع پونچھ کی ڈسٹر کٹ جیل راولاکوٹ توڑ دی گئی، بھارت کو مطلوب سمیت 20 قیدی فرار ہوئے تھے جن میں سے 1 ہلاک ہو گیا تھا۔

واقعے کے بعد راولا کوٹ جیل کے عملے کو معطل کر دیا گیا تھا، 3 اہلکاروں کو حراست میں لے لیا گیا تھا اور جیل کا انتظام پولیس نے سنبھال لیا تھا۔

راولاکوٹ جیل میں قیدیوں کے فرار کا واقعہ اتوار 30 جون کو دن 2 سے ڈھائی بجے کے دوران پیش آیا تھا جب ایک قیدی نے مرکزی دروازے پر موجود سنتری کو گن پوائنٹ پر یرغمال بنایا اور باقی قیدی نکل بھاگے۔

جیل اہلکاروں کو چکمہ دے کر فرار ہو جانے والے 19 قیدیوں میں دہشت گردی، قتل اور اقدامِ قتل کے مجرم شامل ہیں۔

فائرنگ سے ایک قیدی زخمی ہو گیا جو اسپتال لے جاتے ہوئے دم توڑ گیا، فرار ہونے والے قیدیوں میں سزائے موت کے 5 قیدی بھی شامل تھے۔

پولیس نے فرار 19 قیدیوں کی تلاش کے لیے ضلع بھر کی ناکہ بندی اور سیکیورٹی ہائی الرٹ کر دی تھی۔