صلاح الدین ( ہوزے ) کا قبول اسلام

صلاح الدین ( ہوزے ) صاحب تحریر کے ساتھ

بغداد ہی میں تھا کہ ایک دن وہ فجر کے وقت وہاں کی ایک بڑی خوب صورت نیلے گنبد والی مسجد میں یونیفارم کے ساتھ ہی چلا گیا۔اس کا اس مسجد میں جانا اس کی زندگی بدلنے کی وجہ بن گیا۔وہ ہر عمر کے نمازیوں کو فجر کی نماز پڑھتے دیکھ کر حیران رہ گیا۔امام کی نماز میں خوش الحانی کے ساتھ تلاوت نے اسے بڑا سکون اور اطمینان کا احساس دلایا۔اسے کلام الٰہی آسمان سے نازل ہوتا ہوا محسوس ہوا جو دل میں اثر کرتا، اترتا ہی چلا گیا۔ مسجد کے اس ایک نظارے نے ہوزے کی دل کی دینا ہی اتھل پتھل کردی اور اس نے مسلمانوں کے خلاف اس پروپیگنڈے کے غبارے سے ہوا ہی نکال دی جو اس کو فوج میں ہر وقت سننے کو ملتا رہتا تھا کہ مسلمان بڑے غیر مہذب ہیں شدت پسند ہیں ، خونخوار ہیں، جنگلی ہیں اور انسانیت کے دشمن ہیں اور خدا کے بیٹے ( العیاذ باللہ ) حضرت عیسی علیہ السلام کے دشمن ہیں۔اس نے سوچا جو لوگ کسی بھی دوسرے مذہب سے زیادہ دن میں پانچ بار خدا کے سامنے گڑ گڑاتے ہوں، سجدہ ریز ہوتے ہوں ، ہر وقت اس کو یاد کرتے ہوں، اسی سے دعائیں کرتے ہوں اور ایک دوسرے کے ساتھ اخوت کے ساتھ اور امن وامان کے ساتھ رہتے ہوں۔وہ کیسے اچھے انسان نہیں ہو سکتے؟

اس نے فیصلہ کیا وہ مذہب کے بارے میں حق اور سچ جان کر رہے گا۔ اس نے اس کا آسان طریقہ یہ نکالا کہ یو ٹیوب پر مختلف مسلم اسکالرز کو سننا شروع کیا۔اسے زمبابوے کے مفتی مہنک ( Mufti Menk ) کا انداز بھا گیا، جن کا پورا نام مفتی اسمعیل ابن موسی مہنک ہے۔ ان کے چھوٹے چھوٹے کلپس کو سننا شروع کیاجن میں مزاح کا پہلو بھی تھا۔ وہ اسلام کے قریب آتا گیا۔اس نے اسلام کی طرف اپنے میلان کا تذکرہ اپنی ماں سے کیا۔پہلے تو وہ بڑی ناراض ہوئی، سٹپٹائی اور اسے اس کا ذہنی خلل سمجھا تو اس کو علاج کےلئے اپنے ایک معتمد فادر کے پاس لے کر گئی کہ اسے سمجھاؤ۔اس کا علاج کرو۔ یہ پاگل ہو رہاہے۔یہ گمراہ ہو رہاہے لیکن ہوزے پر اس فادر کا جادو بھی نہ چل سکا۔

پھر اس نے سیرت رسول صلی اللہ علیہ وسلم پڑھنی شروع کی تو اس پر اسلام کے دروازے مزید کھلتے چلتے گئے۔اسی دوران اسے پتہ چلا کہ اسلام میں حضرت عیسی علیہ السلام کو ایک بڑے عالی مرتبت رسول کا درجہ حاصل ہے اور ان پر ایمان لانا مسلمان ہونے کی شرط ہے۔ان پر ایمان لائے بغیر کوئی مسلمان نہیں ہو سکتا۔اس کی بیوی اس کی اس ماہیت قلبی کو دیکھ رہی تھی۔وہ اس کے ساتھ مخلص تھی۔اس نے سچ کی تلاش میں کوئی بھی رکاوٹ نہ ڈالی اور اس کی حوصلہ افزائی کی۔

اس کو امید ہے کہ ایک دن اس کی بیوی اور اس کے خاندان کے دوسرے افراد بھی دائرہ اسلام میں داخل ہو جائیں گے۔وہ مسلمان ہو کر بڑا خوش ہے۔وہ اس بات پر بڑا خوش ہے کہ اس کا مسلم کمیونٹی نے دل کھول کر استقبال کیا ہے، اس کو گلے لگایا ہے اور ہر ممکن تعاون کا یقین دلایا ہے۔ اللہ تعالیٰ ہمارے اس بھائی کو استقامت دے اور اس راہ میں آنے والی مشکلات سے دور رکھے اور آسانیاں پیدا کرے۔ ایک مسلمان کے طور پر آج ہفتے کا دن اس کا پہلا دن تھا۔ ہم نے اس کو فون کیا تو وہ بہت خوش ہوا اور اپنے بارے میں کھل کر بات چیت کی۔اسی کا خلاصہ پیش کیا ہے۔