پنجاب کے تعلیمی اداروں میں تدریسی عمل بحال ہو گیا

تفصیلات کے مطابق گزشتہ روز اساتذہ کی یونین اگیگا کی قیادت نے رائیونڈ میں مسلم لیگ ن کی چیف آرگنائزر مریم نواز سے ملاقات کی، جس میں اگیگا کے مطالبات کے حوالے سے تفصیلی بات چیت ہوئی۔

اگیگا رہنما رانا لیاقت کے مطابق مذاکرات میں یہ طے پایا ہے کہ لیو انکیشمنٹ قانون میں ترمیم کا نوٹیفکیشن واپس لے لیا جائے گا۔ سکولوں کی نجکاری کسی صورت نہیں ہوگی اور دیگر معاملات کو حل کرنے کے لیے بیوروکریسی اور ملازمین پر مشتمل کمیٹی بنائی جائے گی۔ مذاکرات کامیاب ہونے کے بعد احتجاج اور تعلیمی بائیکاٹ ختم کر دیا گیا ہے۔

قبل ازیں جمعہ کے روز پنجاب حکومت کے شعبہ تعلیم کے سینئیر افسران کے ساتھ مذاکرات میں جنوبی پنجاب کی ٹیچرز اینڈ ہیڈ ماسٹرز ایسوسی ایشن کی جانب سے یقین دہانی کرائی گئی ہے کہ اب ہفتہ میں ایک روز مطالبات کے حق میں علامتی احتجاج کیا جائے گا ۔

ادھر گوجرانوالہ میں پولیس نے رات بھر اساتذہ کے گھروں پر کریک ڈاؤن کرکے 21 سے اساتذہ کو گرفتا کیا اور 21 نامزد اور 400 نامعلوم اساتذہ کے خلاف دہشتگردی،ڈکیتی ،کار سرکار میں مداخلت سمیت دیگر دفعات کے تحت مقدمات درج کئے ۔18 گھنٹوں بعد عدالت نے اساتذہ کو رہا کرنے کے احکامات جاری کر دیئے تھے۔ذرائع سے معلوم ہوا ہے کہ جوڈیشل مجسٹریٹ نے 21 ٹیچرز کو مقدمہ سے بے گناہ قرار دیتے ہوئے اساتذہ کو 14 روزہ جوڈیشل ریمانڈ پر جیل بھجوانے کی پولیس کی استدعا مستردکر دی ۔

یہ امر قابل ذکر ہے کہ اساتذہ کی ہڑتال اور احتجاج کے باعث متعدد شہروں کے سرکاری سکولوں میں تعلیم کا سلسلہ مسلسل 12 روز بند رہا۔معاملات طے پانے کے بعد اساتذہ نے مساجد میں اعلانات کرائے کہ طلباء و طالبات سکول آئیں ، اساتذہ نے ہڑتال ختم کر دی ہے ۔

strike over,teaching process restored in educational institutions of Punjab,پنجاب کے تعلیمی اداروں میں تدریسی عمل بحال ہو گیا