ساری وستی چُپ ۔۔۔۔ نظم

‏سارے منظر دُھندلے دھندلے
ساریاں شکلاں ڈریاں
سَبھ دے رنگ نیں اُڈے اُڈے
سبھ دیاں اکھاں مریاں
گلیاں وچ چڑیلاں نچن
کھول کے اپنے وال
سہمے سہمے پنکھ پکھیرو
چمبڑے رُکھاں نال
نہ راتاں نوں تارے جگدے
نہ گلیاں وچ دِیوے
نہ کوئی پھٹ جگر دے سیندا
نہ کوئی پِیڑاں پِیوے
نہ مندر دی ٹلَی کھڑکے
‏نہ اندر دے تار
نہ کوئی بانگ مسیتوں آوے
نہ دِسے کوئی غار
چار چفیرے اگ دے بھانبڑ
چار چفیرے دُھپ
ساری وستی چُپ