سلام در بارگاہ امام حُسین ؓ

مقابل اوجِ ستم کے کمالِ صبرِ حُسینؓ
دمک رہا ہے لہو میں جمالِ صبرِ حُسینؓ

جہاں بھی ہونے لگے لازوال ظلمتِ شب
وہیں سے ہوتی ہے صبحِ خیالِ صبرِ حُسینؓ

ستم کا چاک زمیں پر جہاں جہاں گھوما
وہیں ابھرنے لگے خد و خالِ صبرِ حُسینؓ

متاعِ دامنِ انسانیت گہر ہے یہی
کہ رہنمائے بشر اندمالِ صبرِ حُسینؓ

فلک کے پاس نہ تھی ایسی ابتلا کوئی اور
نہیں ہے روئے زمیں پر مثالِ صبرِ حُسینؓ

شبِ ستم کا جگر کاٹتی ہوئی گویا
ابھی بلند ہے تیغِ ہلالِ صبرِ حُسینؓ

یزیدِ وقت کے ایواں میں پھر قیامت ہے
کہ شد و مد سے اٹھا پھر سوالِ صبرِ حُسینؓ

فراتِ خوں سے ہوئی خاکِ کربلا میں نمو
کہ تا ابد ہے ثمر ور نہالِ صبرِ حُسینؓ

۔۔۔۔۔  جاوید احمد ۔۔۔۔۔۔