🌸 غزل 🌸

اُس رات جو میں مسندِ بے خواب سے اترا
اِک چہرہ مری آنکھ میں مہتاب سے اترا

کس غم کی بلندی پہ ہوئی میری رسائی
دل کس لیے آسائش و اسباب سے اترا

تادیر مرا تکیہ و چہرہ رہا غم ناک
کیا قرض تھا آنکھوں پہ جو سیلاب سے اترا

بینائی کے زنداں سے نکالا مجھے دل نے
اک قطرہِ خوں، چشمِ سزا یاب سے اترا

زنجیر کی جھنکار پہ تھا اُس کا تَصرُّف
میں نغمہِ دل سوز تھا، مضراب سے اترا

پھر راس نہ آئی کوئی تدبیرِ تعلُّق
کچھ یوں مرا دل صحبتِ احباب سے اترا

اِک عمر میں پیمانِ رفاقت ہُوا منسوخ
اِک عمر کا یہ بوجھ بھی اعصاب سے اترا

حِدّت سے مجھے حُزن و ہزیمت کی بچانے
اسلاف کا سایہ کسی محراب سے اترا

آنکھوں میں رضی خوابِ شگفتہ رہے، لیکن
اک خواب کا نَشّہ نہ کسی خواب سے اترا
۔۔۔۔۔۔
خواجہ رضی حیدر