”ایک افسانہ ایک حقیقت“ عید کہانی

دوسرے دن میں ابا جی کے ساتھ بازار کی طرف چل پڑا۔ گھر سے آگے چل کر کچھ فاصلے پر عزیز چچا اور حولدار فاضل چچا بھی ہمارے ساتھ مل گئے۔ چڑھائی چڑھتے راستے میں اٹھتے بیٹھتے ہم نو بجے تھوراڑ بازار پہنچے۔
دکانیں کھل گئی تھیں، بیکری کے کارخانے سے دھواں نکل رہا تھا، چچا جمال اپنے لکڑی کے ترازو پر کسی کو آٹا تول کر دے رہے تھے، ستّی بھیا کھجوریں صاف کر رہے تھے، صوفی حسین صاحب کی دکان سے لوگ عید کی خریداری کر رہے تھے، بابو ولی احمد صاحب اور ڈاکٹر عقل محمد صاحب باہر بیٹھے اخبار پڑھ رہے تھے۔ بھائی انور کی دکان پر گھڑیاں مرمت کروانے والوں کا رش تھا لوگ الارم والی گھڑیاں ٹھیک کروا رہے تھے، ابا جی نے اپنی دکان کھولی اور محنت مزدوری کرنے لگے، میں سامنے چچا افضل صاحب کے پاس دھوپ میں بیٹھ گیا۔ میری مطلوبہ دونوں چیزوں کی دکان اِس بازار میں نہیں تھیں۔ ظہر کی نماز کے بعد میں ابا جی کے ساتھ ہل بازار میں گیا، ہل بازار میں چہل پہل تھی لیکن ٹریفک کا ہجوم نہ ہونے کی وجہ سے ماحول پر سکون تھا۔ بڑی بیکری کے آگے ایک فورڈ ویگن کھڑی تھی، قاری ارشاد صاحب اور صوفی سید صاحب کے موٹر سائیکل کے علاؤہ بینک منیجر عارف صاحب کی ایک 76 ماڈل کرولا کار کھڑی تھی۔ صوبیدار عارف صاحب، شوکت یوسف صاحب، سوار لالہ اور حاکم شاہ صاحب کی دکان سے لوگ عید کے لیے جوتے پسند کررہے تھے۔

ایک نورانی چہرے والے بزرگ اپنی دکان میں پھل سجائے بیٹھے تھے اور ساتھ دکان کے ایک کونے میں کپڑے بھی سلائی کر رہے تھے۔ یہ ابا جی کے ساتھی اور اجمل لالہ کے والدِ گرامی رحمت چچا تھے، ابا جی اُن سے ملے اور خیر خیریت دریافت کی ابا جی نے ان کو اپنے عید کے کپڑے بھی سلائی کے لیے دئیے ہوئے تھے۔
ایک دکان کے آگے لوہے کی چارپائی پر عید کارڈ اور دیگر اشیاء فروخت ہو رہی تھیں،یہ کرنل امین صاحب کی دکان تھی، بڑا عید کارڈ پانچ روپے کا اور چھوٹا دو روپے کا فروخت ہو رہا تھا، میں نے پانچ چھوٹے عید کارڈ پسند کیے۔ دکان کے اندر کاؤنٹر پر میر افسر چچا بیٹھے تھے ابا جی نے دس روپے انھیں دیتے ہو پوچھا کہ”کیا آپ کے پاس کھلونا پستول اور پٹاخے ہیں؟“
میر افسر چچا نے کہا:” بہت تھے لیکن آج ختم ہوگئے ہیں شاہ صاحب سے پتہ کر لیں اُن کے پاس لازمی ہوں گے“۔
ہم چلتے چلتےحنیف شاہ صاحب کی دکان پر گئے ابا جی نے سلام کیا تو شاہ صاحب نے عینک نیچے کر کے سلام کا جواب دیا اور کہا: ”آج کیسے راستہ بھول گئے؟“۔
ابا جی نے کہا:” میرے بیٹے کو پستول اور پٹاخے دیں“۔ شاہ صاحب کہنے لگے:”یہ آپ کا بیٹا ہے میں آپ کا پوتا سمجھ رہا تھا“۔
ابا جی بولے:”نہیں نہیں یہ میرا بیٹا ہے اور دوسری جماعت کا طالب علم ہے اور اپنی جماعت کا مانیٹر بھی ہے“۔
میں اپنی تعریف سن کر بہت خوش ہوا،باتوں باتوں میں شاہ صاحب نے پستول اور پٹاخوں کا ڈبہ کاؤنٹر پر رکھا،دونوں چیزوں کی قیمت 20 روپے تھی۔ ابا جی شاہ صاحب کو کہنے لگے کہ میرے بیٹے کو ایک عینک بھی دیں عید والے دن پہنے گا۔ شاہ صاحب نے سرخ شیشوں والے پلاسٹک کی ایک عینک نکال کر دی جس کی قیمت پانچ روپے تھی، میں نے عینک پہنی تو مجھے ہر چیز سرخ نظر آنے لگی،ہر طرف سرخی ہی سرخی تھی۔
وہاں سے فارغ ہو کر صوفی سید صاحب کے دکان سے دو لیٹر مٹی کا تیل لے کر واپس دکان پر آگئے، عصر کے وقت ابا جی نے دکان بند کی تو ہم گھر کی طرف چل پڑے، اترائی اتر کر گھر پہنچے، عینک پستول اور پٹاخے میں سنبھال کر رکھ دئیے، افطاری کے بعد میں نے عید کارڈ لکھے جن پر یہ اشعار بھی درج کیے:

چاول چْنتے چْنتے نیند آ گئی
صبح اٹھ کر دیکھا تو عید آ گئی

عید آئی ہے زمانے میں
میرا دوست گر پڑا غسل خانے میں

ڈبے میں ڈبہ، ڈبے میں کیک
میرا دوست لاکھوں میں ایک

گرم گرم روٹی توڑی نہیں جاتی
آپ سے دوستی چھوڑی نہیں جاتی

دوسرے دن میں نے دوستوں کو عید کارڈ دئیے،کسی ایک دوست نے مجھے جواباً عید کارڈ بھی دیا۔
رمضان کا آخری عشرہ شروع ہوا تو عیدکے انتظار کی شدت میں اضافہ ہونے لگا۔ کپڑے، جوتی، جرسی، عینک اور رومال میری کُل شاپنگ تھی، میں ہر رات سونے سے پہلے اپنی عید کی چیزیں دیکھتا اور پھر سو جاتا۔ ستائیسویں شب ہم نے دیسی مرغا ذبح کیا، اماں نے سفید چاول اور سویاں بھی پکائی تھیں، سب نے مل کر دعا کی، رات کو مسجد میں نوافل ادا کرتے رہے، میں نے بھی 50 نفل ادا کیے اب تھوڑی امید لگی کہ عید قریب ہے۔

انتظار کی گھڑیاں ختم ہوئیں اور اُنتیس رمضان المبارک کو اعلان ہو گیا کہ عید کا چاند نظر آگیا ہے لہذا کل عید الفطر مذہبی جوش و خروش سے منائی جائے گی۔
اب سفینہ ددھے کپڑے استری کرنی لگی، انھوں نے استری میں کوئلے ڈالے اور ہاتھ والے پنکھے سے کوئلوں کو ہوا دے کر استری گرم کرنے لگی، میں بھی استری گرم کرنے میں ددھے کی مدد کرنے لگا۔ ددھے نے سارے کپڑے استری کر کےلٹکائے، کپڑوں کے ساتھ بنیانیں بھی رکھیں،رومال قمیض کی جیبوں میں ڈالے، جرابیں جوتیوں میں ڈال کر قطار وار سب کے جوتے رکھے۔ ابا جی اور سرور چچا کا چھپری رومال اور قراقلی دیوار پرلٹکائی۔ پھر ددھے مہندی بنانے لگی، گھی کے خالی ڈبے میں چینی پتی ڈال کر اوپر ایک تھالی رکھ اطراف سے گوندھا ہوا آٹا لگا کر بند کرکے ڈبہ آگ پر رکھ دیا، وہ ابل کر عرق بن گیا پھر ددھے نے ماچس کی تیلی کے ساتھ اُس عرق سے اپنے ہاتھوں پر پھول بنائے، میرے ہاتھ پر بھی ایک چھوٹا سا پھول بنایا اور ہم سو گئے۔ صبح اٹھ کر ددھے نے سب سے پہلے ہاتھ دھو کر مہندی کے رنگ کا جائزہ لیا اور پھر مانجھا لے کر گھر کے ارد گرد راستوں کی صفائی کرنے لگی۔
اماں نے سرے اور سفید چاول بنائے تھے۔ جب سب کی عید کی تیاری مکمل ہوئی تو سب نے بیٹھ کر دعا کی، آج ناشتے میں پراٹھوں کی جگہ سرے تھے، دہی کے ساتھ چینی ڈال کر سفید چاول تھے۔ نئے کپڑے،نئے جوتے، نئی جرسی، رتی عینک پہن کر میں بہت خوش تھا مجھے لگتا تھا کہ میں ہواؤں میں ہوں۔ پڑوس میں عید ملنے گئے تو خاتم جان چچی نے بڑی محبت سے ماتھا چوم کر عید کی مبارکباد دی اور دو روپے عیدی بھی دی، یہ میری زندگی کی سب سے پہلی عیدی تھی۔
خوشی خوشی ہم عید کی نماز ادا کرنے تھوراڑ کی طرف چل پڑے، آج میں زندگی میں پہلی مرتبہ عید کی نماز ادا کرنے جارہا تھا۔ نئے کپڑوں نئے جوتوں واسکٹ اورکوٹوں میں ملبوس، کندھوں پر رومال، ہاتھوں میں لاٹھیاں لیے خوشبو میں معطر کلمہ طیبہ کا ورد کرتے ہوئے لوگ عید گاہ کی طرف جا رہے تھے۔
آج لوگ بہت غمزدہ تھے، کچھ لوگوں کی آنکھیں نم تھیں کیونکہ اس مرتبہ ”بڑے مولوی ہور“(مولانا عبد العزیز تھوراڑوی) نہیں تھے وہ اس فانی دنیا کو الوداع کہہ کر اللہ کے حضور پہنچ چکے تھے۔ وہ فطرت کے مقاصد کا نگہبان مرد کوہستانی جو اپنے وعظ سے لوگوں کو ہنساتا اور رلاتا تھا اور لوگ اُس کا وعظ سننے دور دور سے پیدل سفر کر کے آتے تھے آج ہر ایک اُس کے دیدار سے محروم تھا۔ عید گاہ میں لوگ جمع تھے، کالج کے پاس ٹنگ کے درخت کے نیچے ممبر لگا تھا اور پروفیسرمولانا عبدالرزاق صاحب عید کا خطبہ دے رہے تھے، دس منٹ کے لیے مولانا عبد العزیز تھوراڑوی کے بڑے بھائی مولانا عبداللہ صاحب نے بھی وعظ و نصیحت کی تو دلوں کا زخم ایک مرتبہ پھر تازہ ہوگیا اور لوگ رونے لگے آج اُنھیں اپنے وعظ میں طنز و مزاح اور لطائف سنا کر ہنسانے والا کوئی نہیں تھا۔
نمازِ عید کے بعد لوگ ایک دوسرے سے گلے مل کر مبارکباد دینے لگے، کسی کسی پاس کیمرہ بھی تھا لوگ گروپ میں کھڑے ہو کر تصاویر کھینچ رہے تھے۔ لوگ مولانا صاحب سے بھی عید مل رہے تھے، میں بھی ابا جی کے ساتھ ساتھ تھا ابا جی نے بھی مولانا صاحب سے عید مل کر مبارکباد دی۔ پھر لوگ ٹولیوں کی شکل میں رشتہ داروں سے ملنے جانے لگے، ہم بھی رشتہ داروں کے ہاں چل پڑے۔ زردہ چاول پلاؤ چائے بسکٹ سویاں سب کچھ تھا لیکن ہم چھوٹوں کو سب سے زیادہ خوشی عیدی کی رقم ملنے کی تھی، دو دو روپے کافی سارے لوگوں نی عیدی دی، سب سے زیادہ مجھے پانچ پانچ روپے کے دو نئے کڑک نوٹوں کی عیدی ملی، سب ملا کر میرے پاس پینسٹھ روپے عیدی جمع ہوئی، میں نے اُن پیسوں کی کئی مرتبہ گنتی کی میں اسوقت اپنے آپ کو دنیا کا امیر ترین انسان سمجھ رہا تھا۔
یہ میری سُرت سوچ کی پہلی عید تھی وہ عید واقعی عید تھی اب تو عیدیں یوں ہی گزر جاتی ہیں۔