آہ۔امجد اسلام امجد۔۔۔۔  ملک ناصر دائود

امجد اسلام امجد کو ہم نے خوب پڑھا۔ان کے اشعار اور کالمز پڑھنے کا موقعہ ملا۔ ان کو پاکستان ٹیلی ویثرن پر بار بار دیکھا۔ایک ہنستا مسکراتا چہرہ یاد میں ہمیشہ دکھائی دیتا رہے گا۔ اُن کے ڈرامے دیکھے۔ہمارے سکول و کالج کے زمانے میں پاکستان ٹیلی ویثرن ہوا کرتا تھا۔سب فیمیلی ممبرز ساتھ بیٹھ کر ڈرامہ دیکھا کرتے تھے۔اشفاق احمد اور فاطمہ ثریا بجیا کے تحریر کردی ڈرامے دیکھے جاتے تھے۔اسی دوران امجد اسلام امجد کا ٹھریر کردہ وارث ڈرامہ چلا اور ایک نئی تاریخ رقم کر گیا۔اگر اس کو پی ٹی وی کا کامیاب ترین ڈرامہ کہا جائے تو غلط نہ  ہوگا۔دوسرے ممالک میں بھی لوگ اسے دیکھتے۔چین میں اس ڈارمہ کو چینی زبان میں ڈب کیا گیا۔ ایک جاگیردار وڈیرے کی کہانی تھے۔جب اس کی قسط چلتی تو سڑکیں سنسان ہو جایا کرتی تھیں۔امجد اسلام امجد کو اس ڈرامہ نے شہرت کی بلندیوں پر پہنچا دیا۔اس کے بعد انہوں نے ٹی وی کے لیے ڈرامے لکھے جن میں دہلیز،سمندر ،دن،فشار شامل تھے۔انہوں نے فلموں کے سکرپٹ بھی لکھے۔فلم قربانی،حق مہر،نجات،چوروں کی بارات،جو ڈر گیا وہ مر گیا،سلاخین اور امانت انہوں نے لکھی تھیں۔

امجد اسلام امجد بنیادی طور پر شاعر تھے۔ان کے تیس سے زیادہ مجموعہ ہائے کلام موجود ہیں۔ان کی شعری کلیات بھی شائع ہو چکی ہیں۔انہوں نے عالمی شاعری کے تراجم بھی کئے۔ان کی نظم’’محبت  کی ایک نظم‘‘ بہت مقبول ہوئی۔ اُس کا ایک بند دیکھیں:

اگر کبھی میری یاد آئے۔۔۔تو چاند راتوں کی نرم دلگیر روشنی میں۔۔کسی ستارے کو دیکھ لینا۔۔۔اگر وہ نخل فلک سے اُڑ کر۔۔۔تمہارے قدموں میں آ گرے ۔۔۔تو یہ جان لینا وہ استعارہ تھا میرے دل کا‘‘۔

امجد پاکستان کرکٹ ٹیم میں کرکٹ کھیلنا چاہتے تھے مگر قسمت ان کو شاعری کے کوچہ میں لے گئی۔ان کی تحریریں ان کو زندہ و جاوید کر گئیں۔

امجد اسلام امجد ایک معلم تھے۔وہ نصاب تیار کرتے تھے۔انہوں نے ورثا کے ساتھ طلبا ء اور چاہنے والوں کی ایک طویل فہرست چھوڑی ہے جوسب ان کی جدائی میں غم زدہ ہیں۔امجد اسلام امجدنے مر کر ہمیں ایک ساتھ افسوس پر ہی سہئی اکٹھا کر دیا۔ان جیسے لوگوں کو زندہ رہنا چاہئیے جو لوگوں میں محبت بانٹتے ہیں۔ان کی ہمیں ضرورت ہے اور ہمیشہ رہے گی۔

ان کا پیغام دیکھئے:

’’محبت ایسا دریا ہے۔۔کہ بارش روٹھ بھی جائے۔۔تو پانی کم نہیں ہوتا‘‘