راجہ محمد فاروق کا بلدیاتی الیکشن کے کامیاب اور پر امن انعقاد پر حکومت اور عوام کو خراج تحسین

انھوں نے مزید کہا کہ پونچھ اور میرپور ڈویژن کے عوام امن پسند اور باشعور ہیں ۔ وہاں بھی امید ہے کہ پر امن انداز میں عوام اپنا حق رائے دہی استعمال کریں گے اور ذمہ دار شہری ہونے کا ثبوت دیں گے ۔ انہوں نے کہا کہ مظفر آباد ڈویژن میں بلدیاتی انتخابات کے دوران عوام کا جوش و خروش قابل تعریف تھا۔ تینوں اضلاع میں پر امن پولنگ ہوئی، کسی بھی جگہ پر دھاندلی کی کوئی شکایت موصول نہیں ہوئی۔

محمد فاروق نیاز نے کہا کہ امن او امان کی صورت حال برقرار رکھنے میں کمشنر ، ڈی آئی جی ، ڈی سی صاحبان، پاک فوج، سرکاری ملازمین ، جوڈیشل افسران ، پولیس، انتظامی افسران اور آزاد کشمیر کے عوام نے اپنا کلیدی کردار ادا کیا۔ انہوں نے کہا کہ میڈیا اور محکمہ اطلاعات نے بھی لوگوں میں ووٹ کی اہمیت اجاگر کرنے اور پر امن طور پر حق رائے دہی استعمال کرنے کی جانب راغب کرنے میں اہم کردار ادا کیا۔

سینئر ممبر الیکشن کمیشن نے امید ظاہر کی کہ میرپور اور پونچھ ڈویژن میں بھی پر امن انداز میں پولنگ کا عمل مکمل ہوگا۔