سکُولے نَیں زمانے نِیاں یاداں

بستہ:
کپڑے بنائی تے ملیشیے ناں جہڑا ٹوٹا بَچی گشناں سا اُسّے نا بستہ بنانےہونے ایسے۔ بستے نیں وچ کتاباں، کاپیاں، سلیٹ، سلیٹی، پلسن، نَڑی نِیاں قَلماں تے دوات باہنے سے۔ تختی ہتھے نَیں وچ پغڑی ہوئی ہونی سی۔ کج نِکّے گاچی مٹی وی نال اَننے سے تے تفریح ویلے پانیے نی ٹُوٹی اُپَّر تختی تہوئی تے گاچی مِٹّی لائی شوڑنے ایسے۔ جسلے تختی سکنی سی اسلے ہک تے اس نی سطح ناں رنگ چٹا ہوئی گشناں ایسا، دووآ لخنے سی بعد سیاہی تختی نیں اُپّر نشان نسی چھوڑنی۔۔

تختی
تختی لِخنے ناں مقصد تے خُش خَطّی اَیسا پر یار لوکاں نے تخریبی دماغے اِس نَیں ہور وی کئی تخلیقی استعمال کَڈھی کِہندے سے۔۔۔۔

تختیاں کُہلاناں۔۔۔ تاں جے پتہ لگے کہ کس نی تختی باٹی ای۔ تے جس نی تختی پَہجّی گشنی سی اُس نَیں دِدّے ترپڑ لوائی تے ایہہ دِخنے سے کہ اُس نی کَنڈ کتنی باٹی ای۔

جسلے کہول پہیڑ ہوناں سا تے تختی ہک موثر ہتھیار بنی گشنی سی۔۔ یقیناً زمانہِ طالب علمی وِچ تُساں وی بذریعہ تختی کھُلنے والے کئی سِراں ناں مشاہدہ کیتا ہوسی۔

راہ وِچّا لَنگھنیاں کدے چاچے بَگھّویا ماسی کالی ہوراں ناں کُتّا پئی گشناں سا تے اُسلے وی تختی بُہوں کَم اَشنی سی۔ آژی نیں ٹرالی بیگ تہرِیکی تے گَڈیاں اُپّر بئی تے سکول گشنے اِنھاں موجاں کی کیہہ سمجھن۔

تختی ناں ہک ہور فایدہ ایہہ سا کہ کدے سکول اَشنیاں گَشنیاں بَدّل ہوئی گَچھّے تے اس کی چھتری نی جائی سرے اُپّر رکھی کِہننَے اَسیاں۔۔

نَڑیاں
نَڑیاں سارے گرائیں وِچ ہونیاں سیاں۔۔ ایہہ خالی تختی لخنے آستے قلماں بنانے نَیں یے کَم نَسیاں اَشنِیاں بلکے کَچّے کوٹھیاں نی پہَچھّی تے خصوصی طور اُپّر بَلیاں دَینَیں ویلے کَم اَشنیاں اَسیاں۔

سیاہی
دواتے وچ سیاہی بائی اس وچ پانی رلائی تے فیر ہک سفنج بائی شوڑنے سے تاں جے سیاہی بستے وچ ڈہلی نہ گچھے۔۔ کج نکے کالخو نال گڑ بائی تے آپوں وی سیاہی بنانے ہونے ایسے۔۔
جہڑے ماہتڑ نِکّے اپنی سیاہی نَسے اننے اوہ دُوئیاں کولا "ڈوبے” منگی تے تختی لِخنے سے۔۔ پَر ڈاہڈے تے تغڑے منگنے ناں تکلف یے نسے کرنے۔
۔۔۔۔۔۔۔۔۔۔۔۔۔۔۔۔۔۔۔
راشد عباسی