سید ماجد شاہ ہوراں ناں ہندکو ناول "بلدا دیوا”

✍️ سید ماجد شاہ

https://www.facebook.com/syed.majidshah.9

تساں یقینا سید ماجد شاہ ہوراں کی جاننے ہوسو۔ ہک شاعر نیں طور اپر یا افسانے نیں حوالے نال۔۔ "بلدا دیوا” وی سید ماجد شاہ ہوراں ناں لخیا وہا ہندکو زبان ناں ناول آ۔

میں ہک طالب علم نیں طور اپر ناول پڑھی تے اپنے تاثرات لخنے نی بہوں کوشش کیتی پر جسلے وی میں ہک ادھ ورقہ لخیا میکی لگا کہ ناول وچ بیان کیتے گئے جہان موضوعات وچا ہتنی نکی جیہی گل کری تے جان چھڑانا کتھیں ناں انصاف آ۔

میں جس زمانے وچ جان گریشم نیں انگریزی نیں ناول پڑھناں ہوناں سیاں اسلے میں اکثر نواں ناول ویک اینڈ اپر پڑھناں شروع کرنا سیاں تاں جے تیہاڑ ، رات ناں حساب اپر تھلے وی ہوئی گچھے تے کوئی فرق نہ پے۔۔ کیاں جے تساں کدے جان گریشم ناں ناول ہک واری شروع کری کہنو تے فر یو ممکن یے ناء کہ تساں اس نیں انجام تک پوہچے سویر اس کی چھوڑی سکو۔۔ بلدا دیوا پڑھنے والے قاری نال وی ایہے گل ہونی۔ اسرے لگناں سید ماجد شاہ کوئی ٹونہ کرنے ناں ماہر آ تے اوہ قاری نیں دماغے کی اپنی مٹھی وچ بند کری کہنناں۔۔ اس کی اوہ کیں دکھنے اپر مجبور کرناں جیہڑا اوہ دسناں چاہناں۔ تے اوہ کیں پڑھائی شوڑناں جیہڑا عام حالات وچ شاید یے قاری ہضم کری سکے۔

دو سو صفحیاں نیں اس ناول وچ کئی کہانیاں تے بکھرے بکھرے کرداراں نی رنگا رنگی اپنی جائی پر جسرے مختلف علوم اپر ناول نگار گل کیتی اس تھی ناول نگار نیں ڈوہنغے تفکر و تدبر تے علمی کثیر الجہتی ناں پتہ لگناں۔ اس ناول وچ اس گل اپر بہوں زور دتا گا کہ مجموعی طور اپر ساہڑے رویے بہوں اہمیت نیں حامل اے۔ تے جسرے کسی علاقے نیں اپر تہند تے تہپ نال ہک ہالہ بنناں آ اسے طرحے ساہڑے رویے وی ساہڑے علاقے اپر ہک ہالہ بنانے۔۔

اس ناول وچ غربت تے امیری، گرائیں تے شہری، شریف تے بدمعاش، سادہ تے چلاک، دردی تے مطلب پرست کرداراں کی جسرے ناول نگار پیش کیتا اس تھی ظاہر ہونا کہ لخاری انسانی نفسیات نیں حوالے نال کتنا علم رکھناں۔

ناول وچ انسانی فطرت تے نفسیات نیں نال نال "ماحول” اپر وی فاضل ناول نگار بہوں ڈوہنغی لو بائی۔ ناول وچ منظر نگاری اسرے کیتی گی جے پڑھنے والے کی لگناں آ جے اوہ کوئی فلم دکھے ای لگا وہا تے اوہ آپوں وی اسے منظر ناں ہک حصہ وا۔ صرف انساناں اپر یے ناول وچ توجہ نیہی دتی گی بلکے کیڑے مکوڑے، پرندے چرندے، مال مویشی، پھل بوٹے ، کہاء پتر تے کسیاں نالے وی نظر انداز نیہے کیتے گئے۔

اس ناول وچ قدیم تہذیباں تے آثار قدیمہ نیں حوالے نال وی بہوں درد مندی نال لخیا گا۔۔ ناول نیں مرکزی کردار شازی نیں ذریعے بہوں کمیں نیاں گلاں کیتیاں گیاں۔ کاش ساہڑے ارباب اختیار و اقتدار ایہے جیہے مشوریاں اپر عمل کرن۔

ناول نیں کجھ جملے تساں نیں ذوق مطالعہ نی نذر اے۔۔۔

° کے سارا کجھ مٹی ہو جلئے؟
° موت ای ترفلاٹ مکاندی اے
° اللہ نال عشق دا مطلب اے ۔۔۔ اس دی پیدا کیتی دی ہر چیزاں نال پیار۔۔ اللہ دی ذات حسن اے۔۔۔ کائنات اس دے حسن دا مظہر اے۔۔۔ تے اس دے حسن تے ساریاں دا حق اے۔
° اوہ بڈیرا ، جیہڑا آپڑیاں خواہشاں تے قابو پا کے انسانیت دا ہتھ پکڑدئے ، اوہ بلدا دیوا ہوندئے۔
° گلاں شروع ہو جلن تے کتھے رکدیئن
° میں کیہجئی جائی رہناں؟ جتھے سورج دے انتظار بچ مشرق دی جائی مغرب دے ٹہاکیاں در دیخڑاں پیندئے۔
° اوہ سوچدا ریہا کہ گناہ دے احساس نال طاقت دا کے تعلق اے؟
° اساں سمجھ نینھ آندی ایہی کہ ایہہ ماں کے شئے ہوندی اے؟
° جیہڑا گزر جلدئے اوہ کدھرے نینھ ہوندا۔۔ اس دا کجھ نینھ ہو ہکدا
° احساس ہووے نہ ہووے، حقیقت تے حقیقت ہوندی اے
° بدمعاشے دی بدمعاشی تے سیاست دان دی بدمعاشی بچ فرق ہوندئے
° آفتاں بچ لوک نینھ مردے، صدیاں دا رہنڑ سہنڑ مر جلدئے
° اصل بچ ہر آدمیے دا سچ بکھرا ہوندئے
° حسن اوہ وے جیہڑا حیرت وچ پاوے تے بندے آں سرت پہلا چھوڑے
° دنیا پھرنے، تے دنیا برتڑیں بچ بونھ فرق ہوندئے
° موتو دی وی آپڑیں ہی ہک رونق ہوندی اے
° دیوے بچ رویے دا تیل کرناں نا خالص ہوسی، دیوا اتنی جلدی بجھ جلسی۔

👈🏽 اس دنیا بچ سب توں بڈا امتحان زور آور دا ہوندئے کہ اوہ آپڑیں طاقت آں کنٹرول کنجو کردئے ۔
۔۔۔۔۔۔
راشد عباسی