جہلم دا مرد قلندر۔۔۔✍️ علامہ مضطر عباسی

راشد عباسی

اشاعت : 2005

علامہ مضطر عباسی ہوراں اردو وچ کتاب "ملنگ نامہ” لخی سی جس کی پروفیسر سعید احمد (سعید فارانی) ہوراں جہدی کری تے پنجابی وچ ترجمہ کرائی تے چھاپے چاہڑیا سا۔

جہلم نال تعلق رکھنے والے عبدالمجید ملنگ ہور حریت پسند ، کلمہ حق آخنے والے تے لوکاں کی اللہ ناں اصلی تے سچا دین دسنے آلے سے۔ اوہ 1909 وچ جہلم وچ پیدا ہوئے سے۔ 1927 وچ انھاں میٹرک ناں امتحان پاس کیتا۔ انھاں نیں ابا ہور انھاں کی سرکاری ملازم بنانا چاہنے سے تے انھاں کی ہک داں جائی رکھایا وی نیں پر انھاں نیں دل وچ علم نال ہلس پہری ہوئی سی۔ اوہ کہرے والیاں کی دسیاں بغیر لہور چلے گئے۔ تے چار سال تک ہک کالج وچ پڑھنے رہے۔

ملنگ ہوراں نی ساری حیاتی انگریزی سامراج نیں خلاف جہدی وچ لنگتھی۔ اوہ لوکاں کی قرآن و حدیث نی تعلیم وی دینے سے تے نالے انھاں کی گوریاں نیں خلاف منظم جہدی ناں حصہ بننے نی وی تبلیغ کرنے سے۔ اوہ کئی واری بندی وان ہوئے پر انھاں سامراج نیں خلاف جہدی نیئی چھوڑی۔ ہک واری اوہ تقریر کرنے سے تے تھانیدار پلس کہنی تے پوہچی آیا۔ ملنگ ہوراں کی آخیا ایس جے انھاں نیں خلاف وارنٹ اے۔ ملنگ ہور تھوڑا چر سوچنے رہے تے فر اس کی آخیا نیں۔۔۔۔
"چل اللہ نیں ملنگ کی گرفتار کری کہن”

تھانیدارے آخیا جے اللہ ناں ملنگ تے اوہ وی آ۔

ملنگ ہوراں اس نی اکھیں وچ اکھیں بائی تے آخیا۔۔۔

"توں اللہ ناں نیں بلکن پیٹ ناں ملنگ ایں”

ملنگ ہور طبقاتی تقسیم نیں سخت خلاف سے ۔۔ اوہ آخنے سے جے ذات پات، اونچ نیچ، امیر غریب ناں معاشرہ انگریزاں ناں بنایا وہا۔ سب سی بڑی نیکی انھاں نیں نزدیک انساناں نی خذمت سی۔ انساناں نی قدر ناں معیار انسانیت سی ذات ، عہدہ، مذہب تے خاندان نئیں۔۔

ملنگ ہور بڑے چنگے استاد سے۔۔ اوہ سارے نکیاں کی مفت نیسے پڑھانے بلکن امیراں نیں نکیاں کولا چنگی فیس کہنی تے انھاں پیسیاں نال اوہ غریب بچیاں نیاں کتاباں، کپڑے تے ہور ضروری چیزاں خریدنے سے۔

عبدالمجید ملنگ ہوراں نیں بارے وچ لوک بکھریاں بکھریاں گلاں کرنے سے پر ہک گل اپر ساریاں ناں اتفاق سا۔۔۔۔ انھاں نی انسان دوستی وچ کوئی شک و شبہے نی گنجائش نہسی۔

۔۔۔۔