پروفیسر ڈاکٹر ذاکر حسین عباسی

ڈاکٹر ذاکر عباسی ہوراں ناں تعلق ملکوٹ، سرکل بکوٹ، تحصیل و ضلع ایبٹ آباد نال آ۔

ابتدائی تعلیم راولپنڈی نے مختلف گورنمنٹ سکولاں ، کالجاں وچا حاصل کیتی نیں۔ ماسٹرز گومل یونیورسٹی تے فر ایم فل قائد اعظم یونیورسٹی وچا کیمسٹری وچ کری تے سکالرشپ اپر پی ایچ ڈی کیمسٹری جرمنی سی کرنے والے ملکوٹ نیں پہلے فرد ایسے۔

پی ایچ ڈی کرنے سی بعد کج عرصہ جرمنی وچ سونی جیئی عالمی معیار نی کمپنی وچ سینئیر سائنس دان نیں طور اپر ملازمت کیتی نیں۔۔ لیکن فر ملک و قوم نی خذمت نیں جذبے مال و اسباب بنانے نی سدھر کی ہرائی شوڑیا۔۔ تے ڈاکٹر ذاکر عباسی ہور مڑی پاکستان اچھی رئے۔

اٹھ سال سی ڈاکٹر ذاکر عباسی نیشنل یونیورسٹی آف سائنس اینڈ ٹیکنالوجی وچ پروفیسر نیں طور اپر خدمات سر انجام دینیں ۔ اوہ تمام علوم، ہنر تے اخلاق جیہڑے انھاں باہر رہی تے سکھے، اوہ پوری دیانت داری نال اپنی نوجوان نسل کی سکھائے کی لگے ہوئے۔

اساں واستے بہوں فخر نی گل ای کہ اج کل ڈاکٹر ذاکر عباسی نسٹ وچ سکول آف کیمیکل اینڈ میٹیریلز انجینئرنگ نیں ہیڈ آف ڈیپارٹمنٹ اے۔ کوہسار نیں تعلیمی اداریاں کی چائیناں جے مری آرٹس کونسل یا کسے ہور مرکزی جائی اپر ڈاکٹر ذاکر عباسی ناں ہک ماہانہ لیکچر رکھیا کرن جس وچ اوہ اساتذہ کی تعلیم و تربیت تے جدید زمانے نے تقاضیاں اپر تربیت فراہم کرن۔ دووآ نوجوان نسل انھاں کولا اپنے سوالات نیں ذریعے اپنیاں الجھناں تے مشکلاں نیں حل بارے وچ وی رہنمائی حاصل کرے۔۔ اس تھی علاوہ ساہڑے کوہسار نیں مختلف تعلیمی اداریاں وچا اچھی کارکردگی نیں حامل طلبا کی وی ڈاکٹر ذاکر عباسی نیں توسط نال نسٹ یونیورسٹی نیں مختلف شعبیاں ناں دورہ کروایا گچھے تاں جے انھاں کی جدید تعلیمی اداریاں وچ موجود سہولتاں ناں جائزہ کہننے ناں موقع لبھے تے انھاں نیں اندر تعلیمی ترقی ناں ہور جذبہ پیدا ویہہ۔