اے این پی کے سینئر رہنما ساتھیوں سمیت ن لیگ میں شامل

انجینئر امیر مقام کا کہنا تھا کہ مسلم لیگ (ن) کی دعوت پر محمد جمال ناصر نے پارٹی جوائن کی ہے اور یہ دن پارٹی کیلئے خوش آئند ہے۔ انہوں نے کہا کہ عوام اور بالخصوص طلبہ میں مسلم لیگ (ن) کی قیادت پر اعتماد میں اضافہ ہو رہا ہے، سیاست صرف نعروں کا نام نہیں بلکہ عوام کو ریلیف دینا اصل سیاست ہے۔

نیوز کانفرنس سے خطاب کرتے ہوئے اے این پی کے سابق سینئر رہنما محمد جمال ناصر نے کہا کہ انہوں نے عوامی نیشنل پارٹی میں 15 سال کام کیا اور وہاں اچھا وقت گزارا، تاہم گزشتہ 13 برسوں سے خیبرپختونخوا میں بدامنی اور عوامی مسائل میں اضافہ ہوا ہے۔ انہوں نے کہا کہ پنجاب اور خیبرپختونخوا کا موازنہ کیا جائے تو واضح فرق نظر آتا ہے، ان کے علاقے میں بے شمار مسائل حل طلب ہیں اور نوجوان شدید بے چینی کا شکار ہیں۔

اس موقع پر انجینئر امیر مقام نے خیبرپختونخوا حکومت پر تنقید کرتے ہوئے کہا کہ صوبائی حکومت کی ترجیحات عوامی مسائل کے بجائے احتجاجی سیاست ہیں۔ پشاور یونیورسٹی سمیت دیگر تعلیمی ادارے مالی بحران کا شکار ہیں، تنخواہوں اور پنشن کے مسائل حل نہیں ہو رہے۔ انہوں نے کہا کہ این ایف سی ایوارڈ کے تحت خیبرپختونخوا کو پورا اور اضافی حصہ مل رہا ہے جبکہ دہشت گردی کے خلاف جنگ کیلئے بھی خصوصی فنڈز دیے جا رہے ہیں، تاہم ان فنڈز کے شفاف استعمال پر صوبائی حکومت کو جوابدہ ہونا ہوگا۔

امیر مقام نے مزید کہا کہ پنجاب میں وزیراعلیٰ مریم نواز کی کارکردگی قابلِ تقلید ہے اور خیبرپختونخوا حکومت کو بھی عملی اقدامات اور عوامی ریلیف پر توجہ دینی چاہیے۔