سرگودھا میں شدید دھند کے باعث پیش آنے والے المناک ٹریفک حادثے میں 14 افراد جاں بحق جبکہ خواتین اور بچوں سمیت 9 افراد زخمی ہو گئے۔ حادثہ کوٹ مومن کے قریب اس وقت پیش آیا جب ایک مزدہ گاڑی بے قابو ہو کر نہر میں جا گری۔
ریسکیو ذرائع کے مطابق حادثے کا شکار تمام افراد ایک ہی خاندان سے تعلق رکھتے تھے اور جنازے میں شرکت کے لیے سفر کر رہے تھے۔ جاں بحق ہونے والوں میں مرد، خواتین اور بچے شامل ہیں۔
تفصیلات کے مطابق یہ افراد اسلام آباد سے فیصل آباد جا رہے تھے کہ راستے میں شدید دھند کے باعث گاڑی ڈرائیور کے قابو سے باہر ہو کر مزدہ نہر میں جا گری۔ حادثے کے نتیجے میں 14 افراد موقع پر ہی جاں بحق ہو گئے جبکہ 9 افراد زخمی ہوئے، جن میں سے بعض کی حالت تشویشناک بتائی جا رہی ہے۔
ریسکیو ٹیموں نے موقع پر پہنچ کر زخمیوں اور جاں بحق افراد کو قریبی اسپتال منتقل کیا۔ ابتدائی معلومات کے مطابق زیادہ ہلاکتیں ٹرک تلے دبنے کے باعث ہوئیں۔
پولیس کے مطابق واقعے کی تحقیقات جاری ہیں جبکہ انتظامیہ نے شہریوں کو دھند کے دوران محتاط ڈرائیونگ کی ہدایت کی ہے۔
