چیف آف ڈیفنس فورسز فیلڈ مارشل سید عاصم منیر سے انڈونیشیا کے وزیر دفاع نے جنرل ہیڈ کوارٹر راولپنڈی میں ملاقات کی۔ ملاقات میں دو طرفہ دلچسپی کے امور، خطے اور عالمی سطح پر سیکیورٹی کی بدلتی صورتحال پر تفصیلی گفتگو کی گئی۔
آئی ایس پی آر کے مطابق ملاقات کے دوران پاکستان اور انڈونیشیا کے درمیان دفاعی تعاون کو مزید وسعت دینے، ادارہ جاتی روابط مضبوط کرنے، مشترکہ تربیتی پروگرامز اور دفاعی صنعت میں شراکت داری کے امکانات پر تبادلہ خیال کیا گیا۔
انڈونیشیا کے وزیر دفاع نے پاک فوج کی پیشہ ورانہ مہارت اور دہشت گردی کے خلاف جنگ میں دی گئی قربانیوں کو سراہتے ہوئے اس خواہش کا اظہار کیا کہ ان کا ملک پاکستان کے ساتھ دفاعی تعلقات کو مزید مستحکم بنانا چاہتا ہے۔
اس موقع پر فیلڈ مارشل سید عاصم منیر نے کہا کہ پاکستان، انڈونیشیا کے ساتھ مضبوط، دیرپا اور باہمی احترام پر مبنی دفاعی تعلقات کا خواہاں ہے، جو مشترکہ اقدار اور اسٹریٹجک مفادات کے فروغ کا باعث بنیں گے۔
