حکومت ملٹری آپریشن کی اجازت نہیں دیگی،وزیراعلیٰ
وزیر اعلیٰ خیبرپختونخوا محمد سہیل خان آفریدی نے کہا ہے کہ ملٹری آپریشن کسی بھی مسئلے کا حل نہیں ہے اور صوبائی حکومت کا موقف بھی یہی ہے کہ مسائل کے حل کے لیے جامع اور ہمہ گیر پالیسی کی ضرورت ہے۔
صوبائی کابینہ سے خطاب کرتے ہوئے انہوں نے کہا کہ بند کمروں میں کیے گئے فیصلے صوبے پر مسلط کیے جائیں تو تمام اسٹیک ہولڈرز میں تشویش پیدا ہوگی اور کوئی فرد یا ادارہ زور زبردستی فیصلے نافذ نہیں کر سکتا۔ وزیراعلیٰ نے واضح کیا کہ زبردستی کیے گئے فیصلوں کے نتائج وہ نہیں ہوں گے جو فیصلہ کرنے والے چاہتے ہیں۔
سہیل آفریدی نے کہا کہ پائیدار امن کے لیے تمام اداروں، سیاسی و مذہبی جماعتوں اور قبائلی مشران پر مشتمل جامع پالیسی ناگزیر ہے، اور تمام فریقین کے مل کر بیٹھنے سے مؤثر پالیسی تیار کی جا سکتی ہے۔ انہوں نے زور دیا کہ بند کمروں میں فیصلوں سے نہ امن بحال ہوگا اور نہ ہی عوام کا اعتماد قائم رہے گا۔
خیبرپختونخواہ اسمبلی میں تمام سیاسی اور مذہبی جماعتوں اور ہر مکتبہ فکر کے نمائندوں پر مشتمل گرینڈ امن جرگہ بھی منعقد کیا گیا، جس کے دوران متفقہ طور پر پندرہ نکاتی ایجنڈے کی منظوری دی گئی۔
