برفانی تودہ گرنے سے پاک فوج کےکیپٹن سمیت تین افراد شہید

پاک فوج کے شعبہ تعلقات عامہ کے مطابق برزل پاس پر شدید موسمی حالات میں بھاری مشینری کے ذریعے برف ہٹانے کا عمل جاری تھا۔ اس آپریشن کی قیادت کیپٹن اصمد کر رہے تھے کہ 3 جنوری 2026 کو رات تقریباً 2 بجے اچانک برفانی تودہ آ گرا۔

آئی ایس پی آر کے مطابق تودے کی زد میں آ کر کیپٹن اصمد، دو فوجی جوان اور ایک سویلین مشین آپریٹر برف تلے دب گئے۔ ریسکیو ٹیموں نے فوری کارروائی کرتے ہوئے انتھک کوششوں کے بعد چاروں افراد کو برف کے نیچے سے نکالا۔

فوجی ترجمان کے مطابق کیپٹن اصمد، سپاہی رضوان اور مشین آپریٹر عیسیٰ زخموں کی تاب نہ لاتے ہوئے شہید ہو گئے، جبکہ ایک فرد زخمی حالت میں نکال لیا گیا۔ شہداء نے انتہائی مشکل اور خطرناک موسمی حالات میں فرائض انجام دیتے ہوئے جان کا نذرانہ پیش کیا۔

آئی ایس پی آر کا کہنا ہے کہ شہداء کی قربانی پاک فوج کی پیشہ ورانہ وابستگی، فرض شناسی اور عزم کی روشن مثال ہے۔ پاک افواج کے تمام افسران اور جوان وطن کے دفاع اور عوامی خدمت کے لیے ہر حال میں پرعزم ہیں۔

ترجمان کے مطابق پاک فوج کے جوان اپنے مقصد اور فرض کی تکمیل کے لیے کسی بھی قربانی سے دریغ نہیں کریں گے۔ واضح رہے کہ 28 سالہ کیپٹن اصمد کا تعلق لاہور سے تھا۔