سینیٹر فیصل واوڈا نے خبردار کیا ہے کہ اگر پاکستان تحریک انصاف نے مائنس ون کی سمت اختیار نہ کی تو پوری پارٹی کو سیاسی میدان سے باہر کیا جا سکتا ہے۔ ایک تازہ انٹرویو میں انہوں نے کہا کہ پی ٹی آئی کی مقبولیت پہلے جیسی نہیں رہی اور اب یہ جماعت صرف طاقت اور مالی فائدے کی سیاست تک محدود ہو گئی ہے۔
فیصل واوڈا کے مطابق ملک کو درپیش مسائل کے مقابلے میں سیاسی قیادت اپنی ذاتی لڑائیوں میں الجھی ہوئی ہے۔ انہوں نے کہا کہ اب مزید برداشت کی گنجائش نہیں رہی، سیاسی انتشار کی وجہ وہی لوگ ہیں جو برسوں تک برداشت کی سیاست کا دعویٰ کرتے رہے۔
سینیٹر واوڈا نے انٹرویو کے دوران ایک نیا سیاسی محاورہ بھی زبان پر لاتے ہوئے کہا کہ اب صورتحال ’ایسی کی تیسی‘ والی حد تک پہنچ چکی ہے۔ ان کا کہنا تھا کہ بانی پی ٹی آئی عمران خان کی بہنوں نے خود یہ بات واضح کر دی ہے کہ عمران خان ملاقاتوں اور رابطوں کے نہ ہونے پر بے چینی محسوس کرتے ہیں۔
فیصل واوڈا نے یہ بھی کہا کہ پی ٹی آئی کی حالیہ پالیسیوں نے جماعت کو ایک مشکل مقام پر لا کھڑا کیا ہے اور اگر رہنماؤں نے سیاسی حقیقتوں کو قبول نہ کیا تو نتائج پوری پارٹی کو بھگتنا پڑیں گے۔
