پشاور — خیبر پختونخوا کی صوبائی کابینہ نے 9 مئی کے واقعات سے متعلق مقدمات کے خاتمے کی منظوری دے دی ہے اور اس سلسلے میں تحقیقات کے لیے کمیٹی تشکیل دینے کی بھی منظوری دی گئی ہے۔
ایڈووکیٹ جنرل خیبر پختونخوا، شاہ فیصل اتمان خیل کے مطابق صوبائی کابینہ اجلاس میں 51 مقدمات میں ریاست کی منظوری کے بعد دستبرداری کی جائے گی۔ انہوں نے بتایا کہ وزیر اعلیٰ نے کابینہ اجلاس میں شرکت کے لیے انہیں خصوصی طور پر طلب کیا تھا۔
سرکاری ذرائع کے مطابق ایڈووکیٹ جنرل آفس نے مقدمات واپس لینے کی سفارشات بھیج دی ہیں۔ پی ٹی آئی اراکین اور کارکنان 9 اور 10 مئی کے مقدمات میں نامزد ہیں اور سزا کی صورت میں اراکین اسمبلی کی نااہلی کا خطرہ موجود ہے۔
کمیٹی کے قیام کا مقصد 9 مئی کے واقعات کی تفصیلی تحقیقات کرنا اور آئندہ کے لیے سفارشات تیار کرنا ہے۔
