جنگ مسلط کی گئی تو مئی والا جواب ملے گا،فیلڈ مارشل
اسلام آباد: فیلڈ مارشل سید عاصم منیر نے واضح کیا ہے کہ اگر پاکستان پر جنگ مسلط کی گئی تو اس کا جواب اسی انداز میں دیا جائے گا جیسا مئی میں دیا گیا تھا۔
ایوانِ صدر میں اردن کے شاہ عبداللہ دوم کے اعزاز میں منعقدہ ظہرانے کے موقع پر صحافیوں سے غیر رسمی گفتگو کرتے ہوئے فیلڈ مارشل کا کہنا تھا کہ بھارت کے ساتھ گزشتہ جھڑپوں میں پاکستان سرخرو ہوا اور اللہ نے ملک کو سربلند کیا۔
انہوں نے کہا کہ پاکستان ایک امن پسند ملک ہے لیکن اگر دشمن حملہ کرے تو جواب دینے کی پوری صلاحیت رکھتا ہے۔ فیلڈ مارشل نے اس دوران غزوۂ احد کا حوالہ دیتے ہوئے کہا کہ جب مسلمان اللہ پر بھروسہ کرتے ہیں تو معمولی چیز بھی دشمن کے لیے ہتھیار بن جاتی ہے۔
تقریب کے دوران صدر آصف علی زرداری اور فیلڈ مارشل سید عاصم منیر کے درمیان تفصیلی گفتگو بھی ہوئی، جبکہ بلاول بھٹو زرداری، آصفہ بھٹو، برطانوی ہائی کمشنر اور امریکی سفیر بھی موجود تھے۔
