پاکستان،سعودی عرب نے اقتصادی تعاون کے نئے فریم ورک کا آغاز
ریاض: پاکستان اور سعودی عرب نے اقتصادی تعاون کو مزید مضبوط بنانے کے لیے ایک نیا فریم ورک لانچ کرنے کا اعلان کیا ہے۔ یہ فیصلہ وزیراعظم شہباز شریف اور سعودی ولی عہد محمد بن سلمان کی ملاقات کے دوران کیا گیا، جس کا مشترکہ اعلامیہ بھی جاری کر دیا گیا۔
دفتر خارجہ کے مطابق، دونوں ممالک نے تاریخی تعلقات کو مزید مستحکم کرنے پر اتفاق کیا ہے اور اس فریم ورک کے تحت اقتصادی، تجارتی، سرمایہ کاری اور ترقیاتی منصوبوں پر بات چیت ہوگی۔ ترجیحی شعبوں میں توانائی، صنعت، کان کنی، آئی ٹی، سیاحت، زراعت اور فوڈ سکیورٹی شامل ہیں۔
اعلامیے میں یہ بھی کہا گیا کہ دونوں ممالک بجلی کی ترسیل کے منصوبے اور توانائی کے شعبے میں تعاون کے لیے مفاہمتی یادداشت (MoU) پر دستخط کی تیاری کر رہے ہیں۔
دفتر خارجہ کے مطابق، پاکستان اور سعودی عرب پائیدار شراکت داری کے قیام کے خواہاں ہیں اور دونوں رہنما اعلیٰ سطح سپریم کوآرڈینیشن کونسل کے اجلاس کے منتظر ہیں تاکہ تعلقات کو مزید فروغ دیا جا سکے۔
