مالاکنڈ،سوات ایکسپریس وے پر ٹرک حادثہ،15جاں بحق
مالاکنڈ: خیبر پختونخوا کے ضلع مالاکنڈ میں سوات ایکسپریس وے پر ٹرک الٹنے کے نتیجے میں 15 افراد جاں بحق اور 8 زخمی ہوگئے۔
حادثہ ظلم کوٹ ٹنل کے قریب پیش آیا، جہاں خانہ بدوشوں سے بھرا ٹرک بے قابو ہو کر گہری کھائی میں جا گرا۔ ابتدائی اطلاعات کے مطابق حادثے کی وجہ ٹرک کے بریک فیل ہونے اور تیز رفتاری بتائی جا رہی ہے۔
ریسکیو 1122 اور لیویز اہلکاروں نے موقع پر پہنچ کر زخمیوں کو ڈی ایچ کیو اسپتال بٹ خیلہ منتقل کیا، جہاں کئی زخمیوں کی حالت تشویشناک ہے۔ جاں بحق افراد میں خواتین اور بچے بھی شامل ہیں۔
انتظامیہ نے حادثے کی تحقیقات شروع کر دی ہیں جبکہ ٹرک ڈرائیور کی گرفتاری کے لیے کارروائی جاری ہے۔ حکام نے شہریوں سے اپیل کی ہے کہ وہ ٹریفک قوانین کی پابندی کریں اور گاڑیوں کی فنی حالت کو یقینی بنائیں تاکہ ایسے واقعات سے بچا جا سکے۔
